Tepora misaka sa lightweight division
CEBU, Philippines — Gihamok sa problema sa timbang kapin usa na ka tuig, si kanhi world boxing champion Jhack 'El Capitan' Tepora (23-1, 17KOs) hingpit nang nakadesidir nga mosaka siya gikan sa super featherweight ngadto na sa lightweight division.
Matud pa ni Tepora nga wala pa niya kini ipahibalo sa Team Pacquiao nga mao karon ang nagduma sa iyang karera, apan mao kini ang direksiyon nga gusto niyang agian pagbalik unya sa boksing nga nahunong kapin sa duha ka bulan gumikan sa COVID-19 pandemic.
"Yes, I'm moving up to lightweight," matud pa ni Tepora, nga sa kanunay nag-ehersisyo aron magpabilin siya sa maayong porma ug kondisyon ning panahon sa kwarantin.
Ang pangan sa 25-anyos nga si Tepora misulbong sa kalibutanhong bantawan human iyang gipatikangkang ang Mehikanong si Edivaldo Ortega sa ikasiyam nga hugna aron sakmiton ang WBA interim super featherweight title niadtong Hulyo 14, 2018 didto sa Axiata Arena sa Kuala Lumpur, Malaysia.
Apan si Tepora nahuboan sa iyang bakus kay wala makakuha sa timbang sa mismong una niyang pagdepensa sa iyang korona batok ni Hugo Ruiz nga undercard unta sa sangka nilang Manny Pacquiao ug Adrien Broner niadtong Enero 19, 2019 didto sa MGM Grand Garden Arena sa Las Vegas. Nakanselar ang away segun sa rekomendasyon sa manedyer ni Ruiz nga si Sampson Lewcowicz kay dili siya gusto nga ibutang si Tepora sa peligro nga sitwasyon.
Misuway unta pagpakli og bag-ong panid sa iyang karera si Tepora, apan nakatilaw hinuon sa iyang labing unang pilde sa iyang karera sa makapadismaya nga pamaagi human siya gitumba sud lamang sa usa ka hugna ni Oscar Escandon niadtong Disyembre 21, 2019 didto sa Toyota Arena sa Ontario, Canada.
“That’s boxing. Sometimes you win, sometimes you lose,” kanayon pa ni Tepora.
Apan masaligon sa kanunay, si Tepora namahayag nga iya nang gilubong sa limot ang tanan ug nga mobangon siya nga mas maayo ug mas lig-on.
- Latest
