Calvin makabalik sunod season

CEBU, Philippines – Masaligon si PBA star  Calvin Abueva nga ilibkas na sa PBA Commissioner’s office ang iyang suspensiyon ug paduwaon na siya sa sunod season.

Bisan og suspendido, si Abueva miapil sa team practice sa Phoenix Fuel Masters sud sa kapin usa ka bulan ug ganado siya moduwa pagbalik human usa ka season nga nawala sa liga.

Ang 6-foot-3 nga si Abueva gisuspenso niadtong Hunyo sa miaging tuig human sa sunod-sunod nga pagpabadlong.

Si PBA Commissioner Willie Marcial una na nga miingon nga gisugtan niya si Abueva nga maka-ensayo uban sa Phoenix ug iya ra unyang pabalikon kon magbag-o na kini.

Sama ni Abueva, malaumon usab iyang coach nga si Louie Alas nga makahimo na sa iyang PBA comeback ang ginganlang nga 'The Beast'.