Demolisyon misikad sa USC-NABC Mayor's Cup
CEBU, Philippines — Ang 2011 Sharks, '88 Barakos, Ronins '97 ug 2002 Goats midemolis sa tagsa-tagsa nila ka mga kontra pagsugod sa University of San Carlos-North Alumni Basketball Conference 2019 Cebu City Mayor's Cup niadtong Domingo didto sa USC North Campus gym.
Si Prince Malana mikadlit og 16 puntos uban ang tulo ka rebounds aron pangulohan ang Sharks ngadto sa 82-62 nga paglampaso sa 2008 Flyboys.
Susama sab ka impresibo ang Barakos, Ronins ug Goats.
Ang wa'y pagbahar nga si Edmund Odulio mitali og 18 puntos, walo ka rebounds ug tulo ka assists sa dihang gikulata sa Barakos ang 1985 Legends, 72-44, ang Ronins milampurnas sa Ninety Niners, 75-56, samtang ang Goats mibihag sa Rebels 2004, 81-65.
Si Jake Saturinas mibahog og 20 puntos, lima ka rebounds ug tulo ka steal sa Ronins, samtang si Joel Dinawanao maoy bida sa Goats uban ang 14 puntos, unom ka rebounds ug duha ka steals.
- Latest
