Malonzo out sa Gilas ng 6 hanggang 8 weeks
MANILA, Philippines — Bangas na naman ang Gilas Pilipinas lineup matapos sumailalim sa operasyon si Jamie Malonzo.
Mangangailangan si Malonzo ng anim hanggang walong linggong rehabilitasyon upang makarekober sa kanyang operasyon.
Kaya naman posibleng hindi ito makasama ng Gilas Pilipinas sa oras na sumalang ito sa training camp sa Hunyo 22 sa Inspire Sports Academy sa Calamba, Laguna.
Paghahandaan ng Gilas Pilipinas ang partisipasyon nito sa FIBA Olympic Qualifying Tournament sa Hulyo na idaraos sa Riga, Latvia.
Ito ang magiging daan para makapasok sa 2024 Paris Olympics.
Nagtamo si Malonzo ng calf muscle injury sa kasagsagan ng kampanya ng Barangay Ginebra sa eliminasyon ng ginaganap na PBA Philippine Cup.
Malaking kawalan si Malonzo sa Gilas Pilipinas.
Isa ito sa mga maaasahan ng Gin Kings sa kampanya nito sa liga.
Sa Gilas Pilipinas stint nito ay nagtala si Malonzo ng mga averages na 6.5 points at 1.9 rebounds sa 2023 FIBA World Cup Asian Qualifiers, FIBA World Cup at FIBA Asia Cup 2025 Qualifiers.
Wala pang linaw kung makarerekober agad si Malonzo bago magsimula ang training camp ng Gilas Pilipinas.
Kung hindi ito makakalaro sa FIBA Olympic Qualifiers ay posibleng sa FIBA Asia Cup Qualifiers sa Nobyembre na ito makabalik sa Gilas Pilipinas.
Sasalang ang Gilas sa tune-up games sa Turkey at Poland.
- Latest
