ALA di na interesado sa Nietes-Palicte rematch

CEBU, Philippines — Napupos na ang 15 ka adlaw nga gitagal sa World Boxing Organization alang sa kampo nilang WBO super flyweight champion Donnie  'Ahas' Nietes ug mandatory challenger 'Mighty' Ashton Palicte aron mohimo og negosasyon alang sa ilang "rematch", apan ang ALA Promotions nga maoy promoter ni Nietes, padayon pa nga nagplano kabahin sa sunod nilang lakang alang sa premyado niyang boksidor.

Pinaagi sa usa ka suwat niadtong Pebrero 4 nga gipadala nilang ALA Promotions President Michael Aldeguer ug Guy Taylor sa Roy Jones Promotions, ang promoter ni Palicte, si WBO Championship Committee chairman Luis Batista Salas mimando sa duha ka kampo nga sabotan ang "rematch" sa ilang boksidor sud sa 15 ka adlaw.

Milapas na lang ang gitagal nga petsa sa WBO, apan walay nahitabo ug mismo si Aldeguer ang miangkon nga wala pa sila makakab-ot og desisyon kun unsay sunod nilang pagabuhaton ni Nietes.

"We haven't come up with a decision yet. We're still discussing what's our next option for Nietes," matud pa ni Aldeguer.

Sa sayo pa, si Aldeguer mipadayag nang daan nga dili siya interesado sa "rematch" nilang Nietes ug Palicte kay alang kaniya wala na kini pulos ilabi na sa resulta sa una nilang away.

Niadtong Septiyembre  sa  miaging tuig didto sa Amerika, kontrobersiyal kaayong gideklarar nga tabla ang ilang away alang sa bakanteng WBO 115-pound title bisan tuod sa tan-aw sa kadaghanan nga si Nietes klaro kaayong maoy daog.

Ang 34-anyos nga si Nietes milahutay hinuon paglangkat sa korona sa WBO human gipilde ang Hapon nga si Kazuto Ioka niadtong bisperas sa Bag-ong Tuig aron mamahimong ikatulong Pinoy'ng  four-division world champion sunod nilang Manny Pacquiao ug Nonito 'The Filipino Flash' Donaire Jr.

  Samtang si Palicte nakaangkon og katungod nga hagiton og balik si Nietes human gipalukapa ang Puerto Rican nga si Jose Chiquiro Martinez sa ilang WBO eliminator niadtong Enero 31 didto sa California.

Kun ugaling mawala gyud sa eksena ang "rematch" uban ni Palicte, gisaytan ni Aldeguer ang usa ka unification bout alang ni Nietes batok ni WBC champion Srisaket Sor Rungvisai, WBA champion Khalid Yafai o di ba sa kanhi kampiyon nga si Juan Franciso Estrada.