Gov's Cup south finals mosikad na
CEBU, Philippines – Sugdan na sa Talisay City AquaStars ug Sibonga Pillars ang ilang 'best-of-three' South Division finals sa 2nd Cebu Governor's Cup Inter-Cities and Municipalities Under-21 Developmental Basketball Tournament karong adlawa diha sa Talisay City Sports Complex.
Mag-abot ang duha sa alas-8 sa gabii.
Walay lalis nga ang Talisay maoy inilog gumikan kay sila lang ang bugtong team nga hangtod karon wala pa'y pilde sa torneyo.
Gani, duha ka higayon nga gilumpag sa AquaStars ang Pillars sa miagi nilang mga engkuwentro.
Ang Sibonga maoy mo-host sa Game 2 karong Hulyo 6, samtang ang Game 3, kon gikinahanglan, duwaon karong Hulyo 13.
Sa laing bahin, ang defending champion Consolacion Sarok Weavers ug San Francisco mosikad sa ilang North Division championship karon pang Hulyo 8 didto sa isla sa Camotes.
Ang Game 2 banatan karong Hulyo 11. Kon duna pa'y Game 3, mahitabo kini karong Hulyo 13.
Ang division champions magtige dayon alang sa titulo sa usa ka 'best-of-three' series sugod karong Hulyo 15 diha sa Cebu Coliseum.
Ang mokampiyon mobulsa og P500,000, samtang ang runner-up modawat og P300,000.
- Latest