Kia, Alaska gusto modaog batok sa ilang mga kontra
CEBU, Philippines — Maningkamot karon ang Kia Picanto ug Alaska Aces nga maputol na ang nagkadina nilang pilde batok sa tagsa-tagsa ka mga kaatbang sa PBA Philippine Cup didto sa Smart Araneta Coliseum.
Ang Kia nga moduwa uban sa bag-o nilang coach nga si Ricky Dandan makigharong sa Magnolia Hotshots sa alas 4:30 sa hapon, samtang ang Alaska makigbatok sa Meralco Bolts sa alas 7 sa gabii.
Ang Picanto nga wala pa katilaw og daog karon nga conference mag-atubang og bug-at nga tahas batok sa Magnolia nga laraw mamawi gikan sa ilang kapildihan ngadto sa igsuon nilang koponan Barangay Ginebra Kings.
Mangulo sa Kia mao sila si Ronald Tubid, Jay-R Reyes, Phil Paniamogan ug Rashawn McCarthy.
Bisan pa og nabunit sa injuries ilang kontra, si Dandan miingon nga kinahanglan nila mohatag sa tanang kusog aron modaog batok Magnolia nga pangulohan nila ni PJ Simon, Marc Pingris, Jio Jalalon ug Paul Lee. (BANAT NEWS)
- Latest