TNT Katropa maninguhang modaog sa Game-4 aron dili maapeke sa series

CEBU, Philippines - Paningkamotan sa TNT KaTropa nga modaog sa Game-4 aron sila makatabla ug dili maapeke sa ilang “best-of-seven” finals series batok sa San Miguel Beermen karong gabii didto sa Smart Araneta Coliseum.

Ang TNT gibiyaan sa Beermen 1-2 human masagunsoni og pilde, 97-107 niadtong Domingo.

Bisan pa niini, ipabilin gihapon ni TNT coach Nash Racela ang ilang higanteng import nga si Josh Smith  kay nakita niya nga naningkamot  kini nga modaog.

Limitado hinuon ang lihok ni Smith itandi sa import sa Beermen nga si Charles Rhodes tungod aduna kini gidala-dala nga minor injury, apan dili kini ang rason sa duha ka sunod-sunod nilang kapildihan.

Gitudlo ni Racela ang ilang turnovers ilabi na gikan sa iyang mga point guards nga maoy nakaguba sa ilang opensa.

Sa iyang bahin, si Beermen coach Leo Austria nangandam sa bangis nga pagbalik sa   KaTropa ug doblehon ilang paningkamot aron makuha ang 3-1 nga bentaha sa serye ug manuktok sa gidamgo nilang grandslam title. (BANAT NEWS)