Natapos na season ni Parker

CEBU, Philippines - Mobiyahi na ang San Antonio Spurs paingon sa Houston, apan magbawon kini og dili maayong balita.Kini kay ang bitoon nga si Tony Parker dili na makaduwa pa sa nahabiling bahin sa NBA playoff season gumikan sa seryosong injury sa iyang paa nga   naangkon niya atol sa ilang  kadaugan batok sa Rockets.

Si Parker mikolapso sa korte dayong ping-it sa tumang kasakit atol sa katapusang kuwarter sa maong duwa niadtong Huwebes diin ang Spurs nakatabla sa Rockets, 1-1, sa ilang best-of-seven Western Conference semifinals.

Ang 34-anyos nga si Parker mipaubos dayon sa MRI exam ug nasuta nga dunay gisi ang iyang paa nga kinahanglang operahan. Si Parker anaa na karon sa ika-16 niyang season ug nakatabang sa Spurs pagsakmit og upat ka NBA titles. (BANAT NEWS)