Pacquiao gusto modaog dayon
CEBU, Philippines - Ang kampo ni Manny Pacquiao mipadayag kagahapon nga gusto niini og paspas nga daog batok sa Australyanong si Jeff Horn sa ilang sangka karong Hulyo sa tinguha nga malinya dayon ang Pinoy ring star alang sa usa ka mas daku nga away batok ni Amir Khan.
Si Pacquiao, ang bugtong eight-division world champion sa kasaysayan sa boksing, gikatakda nga makigharong ni Horn karong Hulyo 2 didto sa Suncorp Stadium sa Brisbane, Australia.
Ang Canadian adviser ni Pacquiao nga si Michael Koncz nagkanayon nga wala madayon ang gitinguha nilang away batok ni Khan gumikan sa Ramadan mao nga ila unang gidawat ang hagit ni Horn.
Midugang si Koncz nga mag-training og maayo si Pacquiao kay gusto nilang dali nga mahuman ang away.
Si Pacquiao manalipod sa iyang WBO welterweight title batok ni Horn nga wala pa’y pilde sa 17 ka away, apan dili kaayo ilado nga boksidor puwera na lang sa mga kababayan niyang Australyano.
Kun ugaling yanong dispatsahon si Horn, si Koncz nagplano nga iparang si Pacquiao batok ni Khan karong Oktubre o Nobiyembre didto sa Middle East o dili ba dinhi sa Pilipinas. (BANAT NEWS)
- Latest