San Miguel mibalik ka inilog

CEBU, Philippines - Nibalik karon ka inilog ang  San Miguel Beermen  nga maoy modaog sa semifinals series batok sa Rain or Shine Elasto Painters human sa dominante nilang kadaugan sa Game-4 niadtong Lunes sa gabii, 105-92.

Ang Beermen nakalingkawas sa komplikadong sitwasyon human nila matabla ang  ‘best-of-seven’ series, 2-2 sa PBA Philippine Cup.

Tungod niini, ang defending champion San Miguel subling gipaboran karon nga modaog sa serye batok sa Rain or Shine dihang usa ka kompletong duwa ang ilang gipakita  ug  gidominar nila  ang opensa ug depensa batok sa Painters sa Game-4.

Lahi sa Game-2 ug Game-3 diin gipilde sila sa Rain or Shine, ang San Miguel wala lang nagsalig ni reigning MVP JuneMar Fajardo sa opensa  kay mitampo usab ang ubang key players sa koponan sama nila ni Marcio Lassiter ug Arwind Santos.

Ang Beermen may purohan  nga moduol karon sa finals pinaagi sa pagdaog sa Game-5 karong gabii didto sa Smart Araneta Coliseum.

Apan mangandam   ang Beermen sa bangis nga pagbalik sa  Painters. Hinuon, adunay problema ang Painters  tungod kay  adunay gihambin nga injury  ang ilang  key players  nga sila si Raymund Almazan ug Jericho Cruz, apan  andam sila nga moatbang sa ipakitang kaagresibo karon sa Beermen. (BANAT NEWS)