Montoya nagsolo sa liderato sa CEPCA anniversary chessfest

CEBU, Philippines – Si Edcel Montoya mibihag sa topseed nga si Rommel Ganzon aron pag-solo niini sa liderato human sa unom ka hugna nga aksiyon sa Cebu Executives and Professionals Chess Association (CEPCA) Silver Anniversary Open Tournament kagahapon didto sa second level duol sa Slimmers World sa SM City-Cebu.

Bugtong si Montoya na lang ang way pilde aron pagtali niini og perpektong 6.0 puntos sa maong 9-round Swiss system nga torneyo nga migahin og kapin sa P50,000 nga ganti ngadto sa mga mananaog.

Si Felix Shaun Balbona ug ang maguwang niining si Marq Gabrielle mipakita nga seryoso sab sila sa ilang kampanya hinungdan sa mainiton nilang duwa nga miresulta ngadto sa panagtabla.

Hinoon mao ra kadto ang gikinahanglan ni Felix Shaun aron angkonon ang ikaduhang dapit sa liderato bitbit ang 5.5 puntos.

Si Ganzon nanaog ngadto sa ikatulo dala ang 5.0 puntos uban nilang FIDE Master Anthony Makinano,  Marc Gabrielle Balbona, Ronald Ganzon, NM Arnold Cadiz, Rosendo Yamyamin, Mario Mangubat, Joseh Caballes, ug Santiago Peque.

Temporaryong sud sa top 16 mao sila si Ramil Wadim, Allan Salientes, Aldwin Daculan, Richard Natividad, ug Rodrigo Alejandre nga dunay 4.5 puntos matag usa.

Gawas sa P10,000 nga ganti, ang makampiyon makadawat sab og digital chess clock kortesiya ni Cebuano sports patron Boogie Lim. Ang motapos sa ikaduha hangtud sa ikalimang puwesto mobulsa og P7,000, P5,000, P3,000 ug P2,000. Muangkon sab sila og maanindot nga mga tropeyo nga gidonar nilang Kelly Uy ug Andrew Aznar. (BANAT NEWS)