Basin og moabuso

Angay’ng magmatngon si DILG Secretary Jonvic Remulla nga kining iyang kamandoan nga tugotan ang kapolisan nga makasulod sa panimalay sa licensed firearm holders dili sila makahimo’g kalapasan sa balaod.

Ang tumong ni Remulla nga sutaon sa kapolisan kon ang mga giisyuhan og lisensya sa armas, duna ba’y safe vault nga may lock ug dili kini magamit sa mga wa tuguti mogamit sa pusil. Maayo man ang iyang katuyoan, apan kon magdinanghag si Remulla, mahimong makahimo og abuso ang mga polis. Ngano man? Kon ang isyu mao lang ang pagsulod kay motan-aw sa butangan sa armas, way problema. NAng gikuyawan nako nga dunay mga polis nga magpataka na lang og suroy-suroy ug mangukay sa kabtangan sa balay nga maisip na hinoon nga nagpahigayon sila og search, ug mangautingkay ang mga butang.

Pananglit dunay mga polis nga moabot, unya manuktok ug mopahibawo sa ilang katuyoan, aw mahimo sila nga pasudlon ug pakit-on sa butangan og armas sa mga licensed gun holders, apan dili sila mangutingkay.

Mao man gyud ni ang sagad mahitabo, ang mga lisensyadong naghupot og armas mao man gyud ang masakripisyo, ug magkatawa lang nga magsud-ong kanila ang mga naghupot og armas nga way lisensya.

Suma’a gud, kon dunay gun ban, apektado tawon ang mga legitimate gun holders kay dili na sila magdala og pusil, apan ang mga kriminal way kukahadlok ug dili motuman, ug dili man sab nila madakpan.

Kining gihimo ni Remulla nagumikan man gud kay dunay mga lisensyadong armas nagamit man sa mga anak, ug pag-umangkon sa tag-iya sa pusil. Makaingon ko nga nagkuwang sila sa desiplina.

Ang tinuod, duna ko’y duha ka pusil kaniadto, pero gikapoyan na ko pagsige’g renew nga mahal na ra ba, gitugyan na lang nako sa kapolisan, ug mag-ampo na lang para sa atong kaluwasan.

Kaniadto, ang akong mga anak gipasidan-an gyud nako nga dili manghilabot sa armas, bisan sa paghikap na lang sa pul-an sa akong mga armas, ug ila gyud kini nga gituman.

Mao nga nakaingon ko nga anaa ra gyud kini sa pagdisiplina sa atong mga anak. Kon makita nila nga sensiro ka sa imong pagpahimangno kanila nga sila silotan nimo kon dili motuman, motahod gyud sila kanimo.

Unya, samtang nindot kining gisugyot nga kadtong madakpan nga maghupot og armas nga way lisensiya, dili na hatagan og higayon nga makapiyansa, angay’ng pangandaman kini sa atong kagamhanan.

Mangandam sila kay siguradong maghuot ang mga piniriso. Ikaduha, ang kagamhanan magkinahanglan og dugang budget kay madugangan man ang mga piniriso nga pakan-onon.