Presidenteng bati'g kasingkasing

Miulbo na sab ang dakong gubat sa Middle East: Iran batok Israel. Seguradong mangapagan ang kinabuhi sa atong mga Overseas Filipino Worker (OFW), kinsa atua didto nanginabuhi. Sila gitambagan na sa maong mga nasud nga mopalayo una, o mamauli na lang, diin sila gikan. Ug daghan ang gustong mouli dinhi sa ato. Apan may himsog aksiyon bang giresponde si Presidente Bongbong Marcos Jr. (PBBM) aron sila malikay-luwas niining delikado nilang kahimtang?

Sa usa ka ambush interview sa media, igo lamang mikatawakatawa si PBBM, kinsa miingon nga dili na kinahanglan, sanglit sagad sa mga OFW nga nanagtrabaho sa Middle East dili man kuno ganahang mouli tungod sa dakong kita nila didto. Busa, anaa ra nila ang paghukom.

Makapakurat ang maong makapasakit sa dughang pamahayag ni PBBM, kinsa bisan ang pag-ila na lang unta, nga silang OFW gikonsiderar mga modernong bayani sa Pilipinas tungod sa minilyong dolyares nga ilang napasulod ug natabang sa atong nasod. Diin, inay luwason, igo ra diay niyang tingsitingsian ug pasagdan.

Hinungdan, ang kadali ra mahinumdoman sa katawhan ang kanhi Presidente Rodrigo Roa Duterte (PRRD), kinsa sa iyang pagpamunoan miagi sab sa susamang gubat (medyo dili pa gani kaayo kadto kuyaw).

Pero gipaalerto dayon ni PRRD ang kinatibuk-ang puwersa sa Pilipinas gikan sa Coast guards, Philippine Navy, Philippine Air Force, Armed Forces of the Philippines, Philippine National Police, basta tanan.

Giandaman gilayon niya ang mga OFW og mga barko ug air bus nga maoy mosugat-kuha kanila aron sila makapauli ug mahilayo sa kakuyaw. Miabot pa sa puntong nakahunahuna si PRRD nga mangabang pa'g dugang air bus. Buwahan, makasakay gyod tanan.

Busa, no wonder, hangtod karon nga dili na pangulo si PRRD, bisag gidan-ok na siya sa administrasiyong Marcos ngadto sa ICC detention facility, ang kasingkasing sa minilyong Filipino: OFW ug dili, kinsa gitandog-gipatagamtam sa iyang mga dalaygong buhat isip usa ka amahan nga nagmahal-nahigugma sa atong nasud ug katawhan, nagpabiling iyaha pa gihapon ni Tatay Digong. Ug nagpaninggit sa tumang kaisog-kamapagarbohon: “Pilipinas, Duterte pa rin!”

Sukwahi niining pamunoan ni PBBM. Diin, ang ilang gipalanog: “Marcos resign!” Ngano? Tungod kay ang kasingkasing atua nakatutok sa gahom-salapi-bahandi ug wala sa nag-ilaid nga mga timawa.