Pagpamutos ni Gwen
Bisan sa pag-insistir nga siyay nidaog sa niaging eleksiyon, bisan sa pagbugalbugal sa katakos pagsabot og Iningles ug sa gidak-on sa paa ni Governor-elect Pam Baricuatro, ug bisan sa pasumbingay nga siya ray kasabot unsay ‘elephant in the room’ ug naka-memorya sa mga linya ni William Shakespeare, si outgoing Governor Gwen Garcia wala nay laing mahimo gawas sa:
· Pagkanaog sa Kapitolyo sa alas-11:59 sa buntag sa Hunyo 30; maong angay siya nga magsugod na sa
· Pagpamutos aron pagseguro nga walay mahibiling sekreto nga malilian nilang Baricuatro ug kaubanan.
* * *
Labing dakong kahadlok ni Garcia, maong nagsige lang gihapon og pangisog bisan wala nay angay, mao nga mawad-an na siya og gahom. Ikaduhang kinadak-an niyang kulba mao nga makamatngon ang iyang mga kaatbang ug mga dumadapig nga wala na siyay gahom.
Sunod sa kalisang nga kon walay gahom dili nang kapamugos bisan unsay iyang gusto, nabalaka sab si Garcia nga wala nay mahadlok niya, nga wala nay mokurog kon magbinaboy na og pangasaba, nga wala nay motuo niya, ug wala nay mag-ulog-ulog sa iyang sayaw ug bisan sa iyang isul-ob.
* * *
Labing dakong babag sa pag-angkon sa kapildehan ug pagtarung sa pagpanamilit, mao ang kalisod pag-angkon nga bakak diay ang pangangkon nga siya ang labing gihigugma sa mga Sugbuanon ug nga siyay gihangad sa 3.4 milyones ka rehistradong mga botante sa Sugbo.
Imposible nang pagbawi sa iyang gipatuo nga nag-ilog pagsugat ang mga bata ug mga tiguwang bisan asa siya nibisita ug nga nag-iyahay og ihaw og manok sa pamasin nga iyang tilawan ang ilang putahe.
* * *
Gipasaligan ni Garcia ang mga mayor nga iyang gitapok sa Kapitolyo sa niaging semana nga magtukod siya og opisina nga ilang maduaw ug nga mosuroy gihapon siya sa ilang mga lungsod ug mga siyudad. Aron tingali nga dili sila mobiya sa iyang partido ug mobalitok ngadtong Baricuatro.
Bisan kontrolado ni Garcia ang Provincial Board, ang bag-ong gobernadora maoy molista ug mopatuman sa mga proyekto sa Kapitolyo. Ambot unsaon pagribal ni Garcia ang P25 bilyones nga tinuig nga budget ni Baricuatro. Angay hinuong sabton si Garcia. Dili daling huwasan ang 21 ka tuig nga pagkahubog sa gahom.
* * *
- Latest
