Panagsumpaki nga gituki

Niining milagrosong hitabo, diin ang dehadong Pamela ‘Pam’ S. Baricuatro maoy midaog sa miagng eleksiyon batok sa tadhan na kaayong Gov. Gwendolyn ‘Gwen’ Garcia diha sa ilang pagpapilig gobernador sa  probinsya sa Sugbo, halos sa tanang dapit mao kini ang gipanag-istoryahan.

Bisan sa mga panimalay, kinsa dili makabotar og kandidato pagka-gobernador, madasigon sab sa paghisgothisgot niini.  Diin, usahay ang baroganan sa amahan ug mga anak bahin sa gipakitang kinaiya ni Gwen ug ni Pam nga gipang-post sa social media, managlahi! Si Pam gikatandi sa usa ka buotang karnero samtang si Gwen sa usa ka gikahadlokang tigre.

Apan nakurat tibuok nasud. Nganong gilupig man sa karnero ang tigre? “Sanglit, adunay gayoy gitawag og God’s intervention.” Pahayag sa amahan ngadto sa iyang mga anak. Unya, midugang: “Pero, dili maayong asaron si Gwen ni Pam diha sa pag-ingon og: “Babayyy, Lay! Bye, bye, Lay.” Sanglit, makasamad lang kinig samot sa iyang dughan. Unta, maoy pirme puy-an ni Pam ang kamapahiubsanon.”

“Dili mabasol si Pam, Erpat. Sobra ra kamaldita si Gwen. Hagbay ra niyang gipasakitan si Pam. Unya, nalangay pa gyod ang pagproklamar bisag klaro na kaayong si Pam ang midaog. Ug dihang lehitimo-opisyal nang naproklamar nga maoy midaog, wa gihapon mo-concede si Gwen. Tawo ra si Pam, Erpat. Napuno na sa kamaldita ni Gwen. Busa, angay ra gayod siyang mobawos.” Padayag sa anak sa kaugalingon niyang baroganan. Ning ilang panagsumpaki, kinsa bay husto: ang anak, o amahan?

Akong tukion. Sa kabahin sa amahan, kinsa miawhag nga dili lang pasakitan si Gwen, ang iyang tumong mao nga kapanalipdan si Pam, kinsa nailhan sa iyang pagkamahigalaon-pagkamasinaboton-pagkamapahiubsanon. Nga maoy nakapadaog niya. Sulod ug gawas sa Kapitolyo, aduna gihapoy mga dumadapig si Gwen ug basig gamiton ang pang-asar ni Pam nga dakong isyu pagguba sa iyang matahom nga imahe.

Sa habig sa anak, ang pagpanimawos kaaway sa Diyos. Mas maayong ipadayon ni Pam ang pagpaubos kay padayon usab siyang ipataas sa Ginoo. Unta, magpabiling bugnawng tubig si Pam ning higayong nagdilaab nga kalayo si Gwen. Buwahan pinaagi sa iyang pagkatubig, matabangan niya kining mapawong. Ug sa pagkapawong unya, may posibilidad magkadugtong ra gihapon ang nabugto nilang mga dalan.

Hinaut pa unta!