Mga kaabag nga iro sa pantalan

Imbis maghuwat sa ubang law enforcement agency sa higayon nga adunay hulga sa bomba o bomb threat, sila na mismo ang dihadiha dayon mosusi sa ingon niini nga alarma tungod kay nagkuha sila og kaugalingon nga mga K9 sniffing dogs ang Cebu Port Authority kon CPA. Adunay 23 ka mga iro nga experto sa pagsimhot sa explosives ug narcotics nga ipalusot sa mga pantalan sa dakbayan sa Sugbo.

Gigahinan gyud og pundo sa CPA ang ingon niini nga programa diin kada usa ka sniffing dog adunay kaugalingong handler ug gipang-deploy sila sa mga pantalan sa dakbayan apil na sa buhatan mismo sa CPA.

Para nako maayo ang programa sa CPA isip proactive nga lakang sanglit delikado ang ilang pasilidad sa mga pagpanghulga ilabi na sa bomba. Sa higayon nga mahitabo kini dihadiha dayon, sila makalihok ug masayran kon tinuod o dili ang mga hulga. Simbako kong adunay gitanom nga bomba hamubo lang nga panahon ang gikinahanglan ug kong maghuwat pa sa ubang ahensya nga moresponde hayan makabuto na simbako lang.

Gamit kaayo kini ilabi na sa mga panahon nga adunay okasyon sama sa karong Semana Santa nga dagsaan sa mga pasahero ang mga pantalan. Sa sulod ug sa gawas tuyokon sa mga K9 ang pantalan aron maseguro nga luwas giman sa peligro. Ang uban kaha nga mga pasilidad sama sa airport aduna ba sad kahay kaugalingong programa sama sa CPA. Posibleng aduna pud, apan kong wala pa mas maayo sundogon nila ang proactive program. Mas maayong andam kay sa molihok kong anaa na ang peligro sa palibot basin ulahi na ang tanan.

Sa pagtimaan sa Semana Santa unta kitang tanan magtinabangay sa pagbantay sa matag usa aron dili mahatagan og higayon ang mga dautan nga makapuntos. Pinaagi sa hugot nga pakig alayon sa katawhan ug sa mga tinugyanan sa balaod seguradong makab-ot ang kahapsay ug kalinaw sa atong palibot.

Sa mga mobiyahe amping kanunay, ilabi na sa mga driver sa mga sakyanan sa kayutaan nga seguradohon nga road worthy ang mga sakyanan kay nakataya ang kinabuhi sa mga pasahero, walay overloading, ang mga pasahero mosunod sa lagda dili tungod kay gimando sa balaod pero gumikan sa inisyatiba sa matag usa alang sa atong kaluwasan.

Maayong pagtimaan sa Semana Santa. Unta gamiton nato kini sa pagpamalandong sa atong mga nahimo ug wala mahimo ug hinulsolan kong aduna kitay kakuwangan. Atong isalig ang tanan uban sa atong buhat ngadto sa atong Manunubos nga si Hesus.