Mission: arestohon ug promosyon maangkon

Hagbay rang naglungotlungot ang administrasiyong Marcos nga idan-ok-tugyan si kanhi Presidente Rodrigo Roa Duterte (PRRD) sa mga kamot sa langyaw'ng International Criminal Court (ICC), tungod kay panahon sa iyang bloody war on drugs gikontrahan na siya sa Commission on Human Rights, ilabi na sa mga walhong Makabayan Bloc sa Kongreso ug gipasanginlang extrajudicial killings na kuno ang nahitabo ug usa na ka crime against humanity.

Saksi ang katawhan giunsa paggukod si PRRD niining kasamtangang administrasiyon gamit ang pagkakorap ug ang pagkawalay-utang kabubut-on niining mga lider nga kanhi grabi nakapasilong sa landong ni PRRD. Apan karon, mao pay miunay pagbudhi ug pagyatakyatak sa kasagrado sa bulawanong imahe nga iyang napondar sa tibuok Pilipinas.

Busa, dihang gilaktod ra ang pag-aresto ni PRRD, walay hard copy sa warrant of arrest nga gikapakita si CIDG Chief Nicolas Torre ug wala na sunda ang hustong proseso, tanang good-governance lovers, pulos nadismaya sa gibuhat ni Torre ngadto ni Tatay Digong ug sa iyang pamilya.

Hinungdan, libo ka libong Pinoy ang nanggawas sa ilang balay ug nanaghimog prayer rally sa nagkadaiyang dapit agig pakita sa ilang dakong suporta ni PRRD. Samot na, pag-birthday ni PRRD, Marso 28, 2025 ug ang tibuok kalibotan na g'yuy nag-selebrar, diin tanang venues napuno, timaan sa ilang pagmahal ni Tatay Digong. Samtang si Torre, ilang gisaway-gimahay!

Apan makalibog. Kay bisan sa kaabusado ni Torre, kinsa wala nay tahod sa atong Batakang Balaod, niining bag-o, usa siya sa gi-promote ni Presidente Bongbong Marcos (PBBM) sa 39 ka dagkong opisyales sa PNP.

Nagpasabot ba kini nga nakadayeg si PBBM sa salawayong gibuhat ni Torre?

Timan-i. Bisag unsaon pa pagpangulipas ni PBBM nga wala siyay labot sa gidangatan ni PRRD, dako gihapon iyang tulubagon. Siyay Commander-in-Chief sa tanang kapolisan-kasundalohan. Dili gyod kini sila mobuhat kon walay mandar gikan kaniya. Diin sa higayon may misyon siyang ihatag, wala man kini nila magustoi, mapugos sila sa pagtuman. Kay military rule: “Obey first before you complain!” Hinuon, kon molampos sila sa misyong gisangon sa Commander-in-Chief kanila, may promosiyon sab silang maangkon.

Kini kaha rason nganong na-promote ang 39? Pangagpas-pangutana ra, ha? Mahimong layo ra sa tinuod. Puwede pong duol!