Viva San Francisco de Asissi!

Gikan sa adunahang pamilya ug anak og usa ka negosyante og tela ang nibiya sa mga butang nga nakapaharuhay kaniya agig pagsanong sa tawag ni Lady Poverty.

Bisan gani ang iyang kaugalingong bisti nga iyang gisul-ob iya mang gihubo atubangan mismo sa iyang amahan ug sa kadaghanan.

Gitawag siya og boang apan ang maong pagpakaboang nagdapit og daghang mga sumusunod apil na si Clara ug gani hangtud karon pabiling buhi pa ang mga Franciscano. Ang kakabus sa mga matang tawhanon apan adunahan sa mga matang Diosnon.

Nahimong salikwaot kun maghisgot kita og kakabus ning panahon nato karon. salikwaot tungod kay ang media nagtudlo kanato nga mas nindot gyud kun daghan kita og pundo ingon man daghan kita og salapi.

Kun anaa ang salapi mahimong maangkon nato ang tanan natong gusto. Kini tungod kay ang mga tawo ning panahon nato karon mohigugma nimo segun sa imong monetary value.

Nahimong makapangutana kita tinud-anay ba gyud ang gipakitang kaayo o bunga lamang kini sa tinguha nga mapahimuslan ka segun sa ilang gusto. Dili lang sa mga butang lawasnon kondili lakip na sab ang impluwensiya.

Daghan ang buot makigsuod labina kun anaa kanimo ang kahigayonan nga sila pud modelanto.

Apan lahi ang kakabus ni San Francisco. Ang iyang kinabuhi bisan pa man tingali kun malisud ang nahimong nakadasig sa uban sa pagpaambit sa ilang naangkon ngadto sa mas nagkinahanglan pa kay kanila. Diha lamang sa pag-angkon sa atong kakabus kita pagapun-on sa Dios.

Diha lamang sa kakabus kita makaalinggat nga ning kalibutan nato karon, wala kitay madala bisan diyot sa atong lubnganan puhon.

Ang tanan ato lamang talikdan ug sa yuta diin kita gikan mobalik kita ingon nga abog.

Ang pagkahimong kabahin sa kalibutan ug sa uniberso diin kita sakop mao man ang nakapahimo natong makahuloganon ug kontento. Ang kalipay nga atong matagamtaman gikan niini dili man kabayran og salapi.

Mentras tanto, Happy Fiesta Balamban!