EDITORYAL — Riders himuon mga first responders?

Dunay plano ang Cebu City Disaster Risk Reduction Management Office nga gamitong first responders ang mga app-hailing riders ug habal-habal drivers sa tinguha nga mapadali ang pagresponde kun dunay mga emerhensiya.

Ang pangulo sa CDRRMO nga si Ramil Ayuman miingon nga ipaubos sa pagbansay-bansay ang maong mga riders. Kun unsa kini nga matang sa pagbansay-bansay wala pay gibutyag kun unsa.

Kun naglakip ba kini sa first aid, CPR, AR ug uban pa mahitungod sa pagsalbar sa kinabuhi. Nindot kini nga nahunahunaan ni Ayuman, ilabi na nga kining mga riders naa kanunay sa karsada ug kay motorsiklo man dali silang makaresponde ug makatabang.

Apan kinahanglan gyud kining ayuhon pagdala ug tarungon pag-train, kung asa lang sila kutob sa ilang pagka first responders.

Kay una, dili sila mahimong alternatibo sa mga emergency medical service (EMS) personnel nga nieskuyla gyud og medical courses ug mas lawom ang kahibalo sa paghatag og pasiunang medikal nga atensyon sa mga pasyente sa dili pa sila dad-on sa tambalanan.

Ang mga first aiders nga mga EMS, mao ang taytayan o inisyal nga mohatag og paglaum sa mga biktima ilabi na sa mga kaso sa aksidente sa kadalanan samtang sila padung dad-on sa tambalanan.

Gikan sa pag-revive sa pasyente hangtud sa pag- stabilize niini aron luwas nga madala ngadto sa tambalanan diin adunay kompletong mga gamit ug doktor nga mao gyuy motambal.

Karon kun ang mga first responders dili magkadimao ang buhaton, posibleng mabutang na hinuon sa peligro ang kinabuhi sa pasyente ug ingon man mismo ang kinabuhi sa miresponde.

Gawas pa niana, dunay mga netizens nga medyo dunay pagduha-duha ani nga sugyot, kay basin kuno abusohon sa ubang riders nga himuong rason ang pagresponde aron magpaturagas og lusot-lusot diha sa karsada ug mabutang na hinuon ang tanan sa peligro.

Laing pangutana karon, kun itugot ba sa mga kompanya aning maong mga riders nga mapun-an og obligasyon ang ilang mga tawo ilabi na nga dunay purohan nga madisgrasya sab sila samtang nagdali og responde.

Maayo kaayo kini nga ideya, apan kinahanglan nga huna-hunaon una og maayo sa mga hingtungdan.