Ang banay nga akong giduaw

Nahimong busy kaayo ko kagahapon. Niduaw ko sa mga panimalay sa mga bata nga nakasinati og hysteria sa ilang tunghaan.

Gawas sa pagbendisyon sa ilang tagsa tagsa ka mga pinuy-anan gihimo ko usab ang pakigkukabildo kanila. Lakip na niini ang pagpangutana sa kahimtang sa ilang pamilya.

Dunay tiguwang nga magdumili og pag-surrender sa habak nga nahuptan bisan pa man kun ako siyang gipasabot nga usa ka dakong sala ang pagbaton niini sanglit supak kini sa pagtulon-an sa Simbahan. Ang mga tawong dunay habak ang kunhod ra kaayo og patuo ngadto sa Ginoo. Kay lagi kun kuhaon o tangtangon ang maong habak dunay dautang mahitabo kanila. Gawasnon man ang matag usa mao nga wala na lang gyud nako pugsa.

Sa laing bahin, nahimong entry point dili lang ang mga occult paraphernalia kondili usab ang mga kasinatian sa trauma. Ang pang abuso sa nagkadaiyang dagway usa man ka kasinatian nga makaguba ug makapusgay sa tibuok unta nga pagkinabuhi.

Gani, maapketuhan man niini ang atong kinabuhi sa pag-ampo. Mga relasyon mahimong maguba gumikan lamang niini ug malisod na gyud ang pag-uli sa normal gawas kun matugkad ang suliran ug masulbad kini sa mas halawom nga paagi.

Dili lang pag-ampo ang gihimo kondili ang makanunayong paghimo sa gitawag natong counseling sa maong mga kabataan nga nahimong nabug-atan gumikan sa mga panghitabo. Sa akong pagkonsagrar kanila ngadto sa Balaang Kasingkasing ni Jesus ug putli nga kasingkasing ni Maria ako silang gipahimangnoan nga kun mahimo kanunayon ang pag-ampo ug sa mga ginikanan ang pagdasig kanila nga mamahimong maayong sanglitanan sa ilang mga anak.