Mosamot ang  problema

Karong Domingo hangtud sa Martes, maproblema og tubig ang mga konsumidor sa Metro Cebu Water District (MCWD) sa north district sa Cebu City.

Maghimo og maintenance checkup ang JE Hydro Bio-Energy Corporation, ang supplier og tubig sa MCWD nga gikuha gikan sa Barangay Lusaran.

Sa ato pa, sulod sa tulo ka adlaw, maibanan na usab og 15,000 cubic meters nga tubig (75,000 ka baril) ang supply nga tubig sa MCWD alang sa iyang mga konsumidor.    

Aw hinuon, tulo ra kini ka adlaw, ug sa Martes sa hapon, mobalik na usab pag-andar ang makinarya sa JE Hydro ug makasuplay na usab sila’g tubig sa MCWD.

Nakaingon bitaw ko nga porbida sab ning Local Water Utilities Administration (LWUA) naghimo ra gyud og kagubot sa pagtudlo nila og Interim Board of Directors, unya nagtudlo og acting general manager.

Tungod sa kaguliyang, ang gitudlo sa LWUA nga acting manager nga si Atty. John DX Lapid, nakahukom nga mo-resign sa katungdanan.

Para nako, bilib ko sa nakab-ot nga hukom ni Atty. Lapid kay samok kaayo ang gisudlan niyang hukom pagdawat sa katungdanan nga wa hatagi og dungog sa mga opisyal sa MCWD.

Ang mga opisyal sa MCWD nga akong nahinabi, nakasaway hinuon kang Atty. Lapid, ilabi na dihang mipahibawo siya nga mohimo siya’g reshuffling sa mga department heads.

Matud pa sa akong nahinabi nga department head sa MCWD nga dili sila basta-basta nga balhinon sa laing katungdanan kay duna sila’y tagsatagsa ka mga qualifications.

Pananglit, ang department head nga nagdumala sa finance, ayaw ko’g ingna nga ibalhin nimo nga hepe sa engineering? Mao na nga mialsa ang kilay sa mga opisyal sa MCWD.

Kabahin sa isyu nga dako kuno kaayo og “losses” nga tubig sa MCWD, ug mao kuno nga gustong imbestigahon sa LWUA ang administrasyon nila ni manager Edgar Donoso, duna ko’y ikasulti niini.

Timan-i nga subsob kaayo ang mga miulbong sunog sa buwan sa Marso, nga gideklarar nga Fire Prevention Month, ug bisan karong buwana, nga Abril na, daghan gihapong sunog.

Nakahibawo ba kamo kon pila ka libo ka cubic meters nga tubig nga magamit sa mga firetrucks nga kuhaon nila sa mga hydrants sa MCWD aron ipawong sa sunog?

Timan-i nga ang ubang tubig nga anaa sa linya sa MCWD gipalit na gikan sa mga private supplier, apan gamiton lang nga libre sa atong mga bombero.

Nagbayad ba gud ang bombero sa MCWD sa gigamit nilang tubig atol sa mga sunog? Pila kaha ang kantidad sa tubig nga nausik ra kay wa makwartahi sa MCWD?

Mao na nga dunay giisip nga Non Revenue Water, tubig nga gipalit ug gigastohan sa MCWD aron matigum, apan gigamit ra alang sa public service.