Tulfo kondenado sa mga sundalo

Ang tawong mapahitas-on dili gyod kaantigo magpaubos. Bisag daghan nang nakasaksi-nakadungog sa iyang paghinawodhawod, dili gyod moangkon nga siya nasipyat. Hinunoa, mangita gyod og lusot para makaipsot.

Tungod sa paghingalan ni Senador Raffy Tulfo og ‘duwag’ sa usa ka sundalo, Private First Class (PFC) Raymond Canlog, kinsa dihang iyang gitawagan pinaagi sa selpon, mihangyo nga dili makahinabi’g dugay kay anaa sa combat operations, inay mosabot si Raffy, ginganlan hinuon kini niyag ‘talawan,’ ay pastilan! Daghang sundalong retired PMA general ang mi-react-gisakitan ug mikondena sa dili makaon sa iro nga gipakitang taras sa ‘feeling king’ nga senador.

Matud pa ni retired General Johnny Macanas, base sa gi-post sa laing vlogging general, dihang na-outnumbered na ang mga sundalo batok sa ilang pagpakigkombati sa mga terorista sa Maguindanao, mao kuno kini kataposang mga pulong ni PFC Canlog nga gibilin ngadto sa iyang mga kauban: “Mag-withdraw na kayo.

I will cover you with fire!” Nga sa ato pa, gisakripisyo niya iyang kaugalingong kinabuhi aron lamang masalbar iyang mga kauban.

Sa pagsulat niini, mikabat nag 500 kapin ang mga retiradong sundalo (sagad tag-as kaayog ranggo) nga mipirma sa manifesto nga nagkondena sa paghingalan ni Raffy og ‘talawan’ ngadto sa naasoyng sundalo.

Aduna pa untay daghang aktibo ang moapil, pero gidid-an.

Ang makapa-boost sa moral, kay hasta si Mayor Benjie Magalong, usa ka retiradong PMAyer general, mipirma sab.

Hinuon, bisan gamay wala madutli ang kaisog-kagahi ni Raffy bahin niining makauulaw nga isyu. Pero, himatikdan.

Imbes tubagon punto por punto ang maong pagkondena, iya hinuong gipakasama nga puro fake news lamang ang mga balitang mikatap sa social media ug lunlon pamolitika-pagpangdaot ra kining tanan sanglit siya si Tulfo mao kunoy nag-No. 1 sa latest presidentiable survey alang sa 2028 national election.

Mimando si Raffy sa tanang political survey company nga dili na iapil iyang ngalan sa mga survey kay gawas nga layo pa ang 2028, dili siya interesado niini. Sanglit, ang iyaha, trabaho, trabaho ra sa Senado.

Kaha? Ning pag-usab-usab sa iyang bulok diha sa Senado, may tibay-ligdong retired PMAyers ug nagpakabanang katawhan pa kahang motuo-salig niya?

Ang tukmang tubag masayran pag-abot sa hustong panahon. Amo ning atngan, Senador!