Katawhan gidagmalan

Daghang senior citizen, kinsa kompiyansa ra kaayo ug wala kapangandami ang mga katuigan human sa ilang pagretiro. Ilabi na kon kini gikan sa pribadong kompaniya, diin ang binulang pensiyon nga madawat gikan sa Social Security System (SSS) P15,000 ra. Unya ang presyo sa mga palaliton karon lakip na ang sa mga medisina labihan nang mahala.

Hinungdan, naaghat na lang pagpalit og lotto ticket, namasin nga maka-jackpot. Apan naunsa ba, nga giimbestigahan man hinuon ang Philippine Charity Sweepstake Office head, Mel Robles, sa Senado tungod sa himatikdang linuto daang winners? Sa sinugdanan, haskang isogang naka-cross exam-puga ni Senador Raffy Tulfo sa mikangang Robles. Pero pagkasunod senate hearing, kalit lang miawop ug nabuotan si Raffy, uy!

Luoya sa mga senior nga motayag lotto, sa? Imbes may gamay'ng chance modaog, gikataw-an rang Mel, kinsa sa adlaw sa iyang birthday, giingnan ni First Lady Liza Araneta Marcos nga: “Mel…parang sabaysabay tayong maging milyonariyo.”

May panday kong gikahinabi. Matud niya, iyang suweldo kada adlaw, P500 ra. Unya, lima ka adlaw ra siya patrabahoon matag semana.

May upat siya ka batang nag-eskuyla. Pastilan, bisan unsaon niya'g daginot, makautang gyod silag dakodako sa tindahan.

Pero atong First Lady, presidente, cabinet members, congressmen ug senators? Labihang hayahaya! Aircon na ang mga kuwarto, dagko pag mga suweldo!

Ilang trabaho? Hala, pangimbistigar sa mga dagko nilang kontra sa politika, pagpasiugda pirmeg trial by publicity, i-condition ang hunahuna sa katawhan nga ang ilang gipang-imbestigahan sad-an na daan.

Busa, angay lang ipaaresto sa kapolisan kay wala g'yud kini mopakita sa Kongreso ug Senado aron ilang tabangan og pagpakaulaw ug iduot hangtod madugmok.

Daghang good governance citizens ang naluoy-misimpatiya sa gidangatan karon nila nii kanhi Bucor Chief General Gerald Bantag, kanhi Kongresista Arnulfo Teves ug God’s preacher Kingdom of Jesus Christ founder Apollo C. Quiboloy, kinsa gipakasama nang mga dagkong kriminal nga wanted bisag wala pa moagi og due process atubangan sa usa ka ligdong-patas nga hukmanan.

Maong adunay mga retiradong opisyal sa kasundalohan ang nanawagan nga paresayinon na si PBBM. Tungod kay ilaha mang nasaksihan kon giunsa pagdagmal ni PBBM ug sa iyang administrasiyon ang gisakitan na kaayong katawhan, kinsa nagpaabot na lang nga duslitan aron modilaab!