Tatay Digong sa pagsilaob mipugong

Daghan ang nakurat dihang midiskurso na si kanhi Presidente Rodrigo ‘Tatay Digong’ R. Duterte (FPRRD) atubangan sa 15K-30K nga katawhang nagpaabot sa maong pinaka-climax nga yugto sa February 25, 2024 Cebu City Candlelight Prayer Rally didto sa South Road Properties. Kay kon unsa kainit ang iyang pagsaway sa mga hiwing binuhatan nila ni First Lady Liza Araneta-Marcos, House Speaker Martin Romualdez ug Presidente Bongbong Marcos (PBBM) nga iyang gipadilaab pag-ayo niadtong unang Candlelight Prayer Rally didto sa siyudad sa Davao, pag-abot niya ibabaw sa entablado dinhi sa dakbayan sa Sugbo, kini kalit lamang nabugnaw-nagmahigalaon.

Matud niya, okay ra ang Charter change, or ang pagbag-o sa mga probisiyon sa atong Konstitusiyon, bisan ang bahin sa termino sa presidente. Basta moagi lang sa husto og legal nga proseso diin adunay tulo ka pilian: People’s Initiative, Constituents body of Congress ug Constitutional Convention. Tanang miaging presidente lakip na si anhing Pangulo Ferdinand E. Marcos Sr. mihimo man niini.  Nga maoy hinungdang miabot og 20 ka tuig ang pagpangalagad niini sa katawhan.

Mosugot ra si FPRRD usbon ang probisiyon sa Konstitusiyon, basta dili na sumpayan og lain pang katuigan ang 6 ka tuig nga termino ni PBBM. Kay para na kini sa bag-ong mamunoan.

Sa welcome address ni host city Mayor Mike maoy mipasulabi sa iyang galamhan ang kamahigalaon. Ang pagpakita nga mahal niya ang BBM-Sara Uniteam. Gani, miawhag-siyagit: “That’s why Marcos-Duterte do your job!” Timaan, nga gusto niyang salbaron ang hingpit nga pagkabungkag niini. Kay lisod kon moreklamo na ang katawhan. Sanglit, di pod siya gustog ‘People’s Initiative.’ 

Mao kini usa sa mga hinungdan, nganong kalmado ug nakapokus ra sa People’s Initiative ang speech ni Tatay Digong. Wala pa moabot ang hustong panahon. Sa Hunyo 30, 2024 pa mohingkod duha ka tuig ang paglingkod ni PBBM sa Malakanyang.

Petsa nga gitagal sa nakatutok retiradong mga PMAyer, kinsa sa hilom nagpaabot kon monindot pa ba ang pagpamunoan ni PBBM. Sanglit sila, apektado ug dismayado pod. Duslit na lang ang kulang aron sila mosilaob. Maong puwerting pugongpugong ni Tatay Digong nga dili madagkotan. Apan timan-i. Ang hangin kalit lang mokalma sa dili pa mokusokuso ang kinakusogang bagyo.