Mga Duterte mag-amping ni Imee

Kahinumdoman nga sa mga press conference nagpakitag dakong suporta si Senador Imee Marcos sa pamilyang Duterte niining dakong gubat sa politika: kanhi Presidente Rodrigo Roa Duterte-Vice President Sara ‘Inday’ Z. Dutete batok sa karon Pangulo Ferdinand ‘Bongbong’ R. Marcos Jr.-First Lady Liza Araneta Marcos-House Speaker Martin Romualdez.

Ug may hait bang hinigiban nga gibaid si Imee batok niining mga dangan nga gustong moukit-mohugawhugaw sa mga maayong binuhatan sa mga Duterte aron sila iyang mapanalipdan?

Niadtong Davao City Candlelight Prayer Rally, gibirahan ni Davao City Mayor Baste Duterte si PBBM. Iya kining gihinganlag bangag-adik, walay ayo, busa moresayin na lang.

Pero kay naikog man si Mayor Baste nga mitambong si Imee sa maong rally, nangayo siya'g pasaylo ni Imee sa unsay iyang nasulti bahin ni PBBM, agig respeto ngadto sa senadora.

Apan naunsa ba nga human niadto, sa ambushed interview, miingon man si Imee nga nangayo kunog pasaylo si Baste kaniya sa paghingalag ‘adik’ ni PBBM ug gustong paresayinon?  Sa pagka-emosyonal ni Baste, nasulti niya kini.

Kay kinsa ba kunoy dili mahadlok kon ang Tatay Digong ug Inday Sara ni Baste mapriso? Nga daw mogawas, nangayo sab og sorry si Baste ni PBBM.

Wala makaayon si Mayor Baste sa gipadagang istorya ni Imee. Busa sa iyang Sebastian ‘Baste’ Duterte post, giklaro niya:

“Madame Imee, linawin ko lang kasi ginagamit mo na sa drama mo diyan sa media. Humingi ako ng tawad dahil naawa ako sa’yo, hindi dahil sa sinabi ko tungkol sa kapatid mo na presidente.

Undangi kog gamit anang imong jamming. Gipalampas na tika kausa, pero banha gihapon kaayo ka.”

Namatikdan ni Mayor Baste nga anaa gyod sa kinaiya ni Imee ang ‘blood is thicker than water.’ Marcos ang dugo ni Imee. Natural, mas mahal niya si PBBM ug angay panalipdan. 

Hinungdan, iyang gipakalat nga nahadlok si Baste nga mabilanggo si PRRD ug Inday tungod sa ICC-Duterte issue.

Ultimong diehard Duterte supporter-vloggers nga nakamatikod, nagpunay'g pahinumdom sa mga Duterte: ‘Dapat, VP Inday mag-amping ni Imee.

And never trust to Marcoses again!’ Nagpasabot ba kining gimahal gihapon sa kinabag-an ang mga Duterte?

Ato ning mahibaw-an ning umaabot Cebu City Prayer Rally, Pebrero 25, 2024.