Angay ba'ng mobulag?

Ambot unsay nasulod sa utok ni kanhi Presidente Rodrigo Roa Duterte nga mikabayo na usab siya sa mga lakang pagbuak sa Mindanao gikan sa Luzon ug Kabisay-an aron mahimong usa ka independiyente nga nasud.

Hinuon, kining panawagan ni Duterte paghimo sa isla sa Mindanao nga separate nga nasud gikan sa Pilipinas klaro nga kabahin sa gusot nga gikalambigitan tali sa iyang pamilya ug sa pamilya ni Presidente Ferdinand "Bongbong" Marcos.

Gani naghinapakay karon og lapok ang duha ka kampo. Si Duterte mialegar kang Presidente Marcos nga nagumon kuno sa cocaine samtang misumbalik usab si Marcos nga ang kanhi presidente tiggamitan usab og druga nga fentanyl.

Nagkadako na kining ilang ayaw. Nga mugna usab gikan sa gubot nga gikalambigitan nilang Bise Presidente Sara Duterte ug House Speaker Martin Romualdez. Kon magpadayon kini, dulom pa sa alkitran ang kapadulngan ning atong nasud.

Hinuon, speaking of Mindanao, hagbay ra kining mga lakang paghimo niini  nga nasud gawas sa Pilipinas. Kaniadtong sa elementary pa ko, daan nang mikisaw ang mga movement nga magpalahi sa Mindanao gikan sa Luzon ug Visayas.

Usa sa mga movement mao kadtong Mindanao Independent Movement nga gipangunayan mismo sa nabantog nga Mindanaoan lawyer nga si Ruben Canoy. Apan wala misaler ang maong movement ug nahanaw na lamang sama sa bula.

Taliwala niining bag-ong pagkisaw, daghang pangutana ang mitumaw nga angay ba gayud nga mobulag ang Mindanao gikan sa nasud nga Pilipinhon. Basin baya nga bunga lamang kini sa mga political interest sa pipila.

Alang nako, wala kinahanglana ang pagbulag sa Mindanao gikan sa nasud. Hinanggaw kini nga ideya nga dili angay hatagan og pagtagad tungod kay bunga lamang kini sa ka hakog sa gahum sa pipila nga walay laing gihunahuna kondili ang ilang kaugalingong interest.