Haom ang SRP

Sa akong pagsulat niini kagahapon sa hapon, padayon ang pasundayag sa naila na nga Sinulog Festival didto sa South Road Properties isip kabahin sa selebrasyon sa tinuig nga kapistahan sa Senior Santo Niño sa dakbayan sa Sugbo.

Ikaduha na kini ka tuig nga didto gipahigayon sa SRP ang Sinulog Festival. Daghang mirebenta kaniadto pagbalhin sa venue sa maong kalihokan tungod lagi kay maoy naandan na ang Cebu City Sports Center.

Gani hasta si Cebu Governor Gwendolyn usa sa nangugat batok sa pagbalhin sa Sinulog sa SRP. Iyang giundang ang iyang naandang pagsayaw sa Sinulog ug didto niya gipahungaw ang iyang pag-ikid-ikid sa Sinulog sa lungsod sa Carmen sa niaging tuig.

Niining ikaduhang edisyon sa Sinulog Festival sa SRP, wala gihapon mahanaw ang mga protesta. Kay delikado kuno sa mga contingent ug mga mosaksi ang kainit gumikan kay bantang kaayo sa adlaw ang maong venue.

Apan wala gayud matandog si Cebu City Mayor Michael Rama. Determinado siyang anha na sa SRP ipahigayon ang Sinulog matag tuig. Kay lagi nahadlok siya sa siguridad sa katawhan kon sa naandang venue kini ipahigayon.

Hinuon, in fairness ni Rama, mora og insakto usab ang iyang desisyon pagbalhin sa venue sa Sinulog. Dako ang venue sa SRP ug maghatag kini og kahimugaway sa mga contingent ug sa mga mosaksi sa maong festival.

Apan insakto usab ang mga bagulbol sa uban. Init gayud tuod ang maong venue ug delikado ang mga continget ug mga mosaksi nga ma-heatstroke. Ug kini maoy angay nga tan-awon sa kagamhanan sa dakbayan.

Hinuon, alang kanako, haom ang SRP isip venue sa Sinulog, isip festival nga nagkadako na matag tuig og naila na sa tibuok kalibotan. Angay lamang nga hatagan og modern nga venue ang maong pasundayag.

Ikaduha pa lamang ka hugna nga gipahigayon ang Sinulog sa SRP. Hinuon sa ngadtongadto, siguradong makorehian na ang unsa mang problema nga gisagubang niini karon.