Sangpotanan sa BRT

Miani og nagkalainlaing reaksiyon ang panawagan sa duha ka sakop sa Konseho sa dakbayan sa Sugbo nga angayang hunongon ug dili na ipursige ang bus rapid transit tungod kay palyar kini nga proyekto sa transportasyon sa siyudad.

Gisugyot nilang Konsehal James Anthoy Cuenco ug Jocelyn Pesquera nga mas maayong hungonon na ang proyekto sa BRT tungod kay wala kini kaayohang ikadalit sa kalamboan sa sektor sa transportasyon sa dakbayan.

Gani matud pa sa duha sa ilang diskurso sa Konseho nga usa ka dakong kapakyasan ang maong proyekto. Alang kanila, dili na kini haom karong panahona ug nga dili na angay nga ipamugos pa nga sapnayon sa mga Sugboanon.

Apan stupido kuno ang lakang pagpahunong sa BRT project matud ni Mayor Michael Rama. Gikwestiyon usab ni Rama nganong karon na lamang panahona mitingog ang maong duha ka konsehal batok sa BRT nga kusog nang miarangkada sa dakbayan.

Gani, si kanhi mayor Tomas Osmeña, ang proponent sa BRT, mirebenta usab batok sa lakang pag-undang sa maong proyekto. Matud niya nga ang BRT alang kuno niadtong katawhan nga walay sakyanan nga makapahimulos sa komportable’ng mass transportation system sa dakbayan.

Gidasonan usab kini sa usa ka giingong urban planning expert kinsa miingon nga ang BRT gituyo alang sa hamugaway nga pagsakay sa commuting public ug nga kini giimplementar dili aron pagsulbad sa problema sa trapiko sa dakbayan.

Ambot kon unsa ba gayud ang sangpotanan niining maong proyekto. Insakto ba ang duha ka konsehal nga nanawagan nga undangon na kini? O angay lamang ba nga ipadayon kini tungod kay nahinayak na ang kagamhanan pag-implementar niini.

Hinuon, alang kanako, tungod lagi sa ka daghan nang sakyanan nga nagbahis niining gagmay ug hagip-ot tang kadalanan sa dakbayan, ulahi na ang pag-arangkada sa BRT. Dako akong pabor niini kon kaniadto pa untang dekada nubiyenta kini giimplementar sa kagamhanan dinhi.