Panghinaut

Naanad na kong dili maghimo og New Year’s Resolution kay sukad sa bata pa ko dili gayud ko motuo niana. Kay kong gusto gayud ka nga mousab sa imong kinaiya o batasan, nganong magpaabot pa man ka sa bag-ong tuig?

Apan aniay akong dakong paghandom alang sa bag-ong tuig. Nga unta adunay dakong kausaban alang sa kalamboan ang dakbayan sa Sugbo. Hinuon dili lamang ang siyudad kondili apil na ang Metro Cebu ug ang probinsiya.

Numero uno sa akong lista sa paghandom nga unta matuman mao ang aspeto sa trapiko sa Metro Cebu, ilabina sa siyudad sa Sugbo nga nagkagrabe ang sitwasyon bisan asang lugar ug mora na og walay kasulbaran.

Hinaut nga kini maoy unahon og sulbad sa administrasyon ni Mayor Michael Rama. Sa niaging tuig, halos tanang reklamo sa katawhan sa siyudad kabahin sa problema sa trapiko, ilabina taliwala sa konstruksiyon sa Bus Rapid Transit.

Gani, dili lamang ako, daghan ang nagtuo nga walay maayong kaayohan ang dala niining BRT sa dakbayan sa Sugbo ning panahon nga hilabihan na ang paghuot sa atong kadalanan mugna sa nagkadaghan nga sakyanan ug sa kakulang sa bag-ong mga karsada.

Wala koy pagbabag sa BRT kon kaniadtong dekada nubiyenta pa kini giimplementar sa siyudad sa Sugbo, niadtong panahon nga gamay pa ang volume sa mga pribadong sakyanan nga nagdagan sa kadalanan ug nga sayon pa ang pagpalapad sa mga karsada.

Apan karon, good luck kanatong tanan. Daghan ang nagtan-aw nga magkayamukat gayud ang agi ini’g arangkada na unya sa mga bus sa BRT. Ilabina nga wala pay mga bag-ong karsada nga giugmad nga mamahimong alternatibo sa mga motorista.

Daghan pa unta ko’g paghandom nga matuman sa 2024. Kini sama sa kalamboan sa nagkagusbat nga imahe sa peace and order ug pagpalambo sa drainage system. Apan limitado kaayo ang atong espasyo.

Manghinaut na lamang ako alang sa usa ka mabulokon ug mabungahon nga Bag-ong Tuig kanatong tanan.