Milurang ang police visibility

Gitay-og na usab ang dakbayan sa Sugbo og dakong krimen bisan pa man sa paningkamot sa kapolisan ug lokal nga pangagamhanan pagpatunhay sa kahusay og kalinaw alang sa siguridad sa mga molupyo niini.

Kaniadtong sayong buntag sa niaging adlaw, yano lamang kaayong miransak ang pipila ka armadong tawo ngadto sa usa ka dakong pawnshop sa dalang Colon, ang usa sa labing busy ug dagsaan nga lugar sa downtown ning siyudad.

Ilang nalimas ang hilabihan ka daghang alahas sulod lamang sa pipila ka minuto. Sa akong pangagpas, gamay rang usa ka milyon ka pesos nga kantidad sa alahas ang nasikoy sa mga tulisan kinsa nagtakoban nga mga ahente sa National Bureau of Investigation.

Sa kadali sa maong panghitabo, dili malalis nga mga professional robber kadtong mitulis sa maong pawnshop. Sa video footage, atong makita nga pipila kanila ang nagdala'g mga tag-as nga firearms nga mora ba'g mga sakop sa militar.

Hinuon makapangutana kita ngano nga kulang sa presensiya sa kapolisan niadtong tungora ang Colon diin adunay hilabihan ka daghan sa mga establisimento nga hugopanan sa katawhan matag adlaw. Hinungdan nga wala gyuy sami ang maong pagpanulis kay lagi wala gyuy mga pulis nga nagpatrolya.

Ako bitaw nga nabantayan karong panahona nga minos na og presensiya sa kapolisan ang Colon, ilabina matag gabii. Kini usab siguro maoy naobserbaran sa mga kriminal hinungdan nga misiaw na usab sila sa ilang dautang binuhatan.

Kaniadtong panahon sa administrasyon ni Presidente Rodrigo Duterte, daghang polis ang nadestino sa downtown, ilabina sa Colon. Kini sa dihang gipakusgan pa sa kagamhanan ang kampanya batok sa ginadili nga druga.

Malinawon tuod ang Colon ug wala nay mga insidente sa pagpanulis ug pagpaglabni kay lagi adunay kapolisan nga nag-roving. Apan karon milurang ang police visibility sa maong lugar hinungdan nga mihasi na usab kining mga badlongon sa katilingban.