Nahibalik sa trono

Aniay maayong balita. Nagmaya ang nasudnong Pilipinhon sa dihang nasungkit sa Gilas Pilipinas ang bulawang medalya sa basketball sa 19th Asian Games didto sa Hangzhou, China sa niaging semana.

Sa katapusan sulod sa subra unom ka dekada, nakab-ot sa Pilipinas ang medalyang bulawan sa basketball. Kaniadtong 1962 pa nakuha sa nasud ang gold sa basbetball pinaagi sa koponan nilang Caloy Loyzaga.

Kining maong kalampusan mitumaw human sa makaluluoy nga performance sa Gilas Pilipinas sa nakalabay nga FIBA World Cup diin ang nasud maoy usa sa mga host uban sa Japan ug Indonesia.

Ang maong kalampusan natigayon usab human gipahigayon ang revamp sa coaching staff sa Gilas Pilipinas diin ang longtime coach sa maong koponan nga si Chot Reyes mikanaug ug gipulihan ni Tim Cone.

Hinuon, niining dakong kalamposan sa Gilas Pilipinas sa Asian Games, nahibalik na ang nasud sa trono sa gingharian sa basketball sa Asia.

Angay lamang, gumikan kay ang maong paugnat sa kusog maoy usa sa atong national pastime.

Apan dakong pangutana karon kon masustinehan ba sa Pilipinas ang pagkahari niini sa Asia sa natad sa basketball.

Kini tungod kay mi-level up na usab ang ubang mga nasud, ilabina ang Japan, Iran ug Jordan.

Sa atong nakita sa nakalabay nga Asian Games, thrilling kaayo ang mga dula, ilabina ang mga dula sa Pilipinas batok Iran ug Pilipinas batok China.

Nagpasabot kini nga nagkainit na ang rivalry sa basketball sa rehiyon.

Ato lamang atangan ang umaabot pang international nga kompetisyon. Apan dako akong pagtuo nga nahibalik na ang Pilipinas sa international stage sa basketball. Ug hinaut nga dili kini sagolan og mantsa sa pulitika.