Russian investment

Aniay maayong balita. Gikataho nga ang mga negosyanteng Russian gusto kuno nga moanhi sa Sugbo aron pagbutang og mga negosyo. Kini maoy gipahibawo sa kagamhanan sa dakbayan sa Sugbo human sa tulo ka adlaw nga pagbisita ni Mayor Michael Rama sa Russia dili pa lamang dugay.

Matud pa nga ang Sugbo maoy gikatakdang destinasyon sa mga negosyanteng Russian nga nagtinguha nga mamuhonan sa turismo ug sa uban pang sektor. Kini ang natigayon atol sa biyahe ni Rama ug ubang mga opisyal sa siyudad ngadto sa siyudad sa Vladivostok sa Russia.

Base sa pamahayag Cebu City Hall, seryoso ang mga Russian sa ilang interes nga magnegosyo dinhi. Gani gusto nia nga adunay direktang biyahe tali sa mga dakbayan sa Sugbo ug Vladivostok, usa ka proposal nga gikaayonan usab ni Rama.

Gani, miingon si Rama nga iya kini nga ipadangat ngadto ni Presidente Marcos. Ug nakig-alayon na usab ang mayor sa kadagkoan sa Philippine Airlines ug Cebu Pacific Air alang sa posibilidad sa paglusad og direktang flight tali sa duha ka mga siyudad.

Aw, kon tuohan nato ang mga pamahayag sa mga opisyal sa dakbayan, makaingon kita nga nagmalampuson gayud ang biyahe ni Rama ngadto sa siyudad sa Vladivostok.

Ug manghinaut usab kita nga kadtong mga Russian nga interesado nga magnegosyo dinhi makakita sa Sugbo nga angayan gayud buboan og puhonan.

Bitaw, welcome kaayo kini nga kalamboan alang sa mga Sugboanon. Ang interes sa mga Russian pagnegosyo dinhi maoy timailhan nga ang Sugbo maoy usa sa maayong lugar sa nasud alang sa mga International investment.