Kinsay nag-antos?

Dili na gayud mabangbang niining panahona ang nagkaseryosong problema sa dagan sa trapiko sa Metro Cebu, gikan sa dakbayan sa Carcar sa south padulong ngadto sa dakbayan sa Danao sa norte nga bahin ning  lalawigan sa Sugbo.

Gani, ordinaryo na nga atong masugatan sa social media matag adlaw ang mga reklamo kabahin sa pahuot sa mga nag-unang karsada dinhi sa Sugbo. Bisan unsang orasa aduna gyuy high blood nga mosuol tungod niining maong problema.

Well, ato nang nasinati karon ang kakulang sa plano ug political will pag-implementar sa solidong transport system sa atong mga lider kaniadto. Hinuon, adunay mga plano apan kutob ra sa plano gumikan kay napurnada kini gumikan sa pulitika.

Nahinumdom pa ko nga adunay iladong Sugboanon nga kongresista niadtong dekada nuybienta nga nangusog pagbutang unta og light rail transit (LRT) gikan sa siyudad sa Carcar paingon ngadto sa dakbayan sa Danao.

Apan nahagba ang iyang proposal human kini tiradora sa usa ka impluwensiyado nga mayor sa dakong dakbayan sa Metro Cebu. Di gusto ang maong mayor nga moagi ang LRT sa iyang siyudad. Mao nang wala gyud natigayon ang maong proyekto.

Nindot usab unta kadtong proposal kaniadto ni kanhi kongresista Raul del Mar nga maghimo og mga tunnel sa estratihekong lugar sa dakbayan sa Sugbo aron pagluag unta sa mga nag-unang karsada. Apan wala kini hatahi og pagtagad sa mga lider sa dakbayan kay lagi dili man sila kaalyado.

Aniay bus rapid transit nga kamulong giugmad karon sa siyudad sa Sugbo. Apan ambot kon mosaler pa ba kaha kini ning dakbayan nga hagip-ot ang kadalanan ug hilabihan na ka daghan ang mga pribadong sakyanan. Basin baya kon magdugang lamang kini sa problema sa trapiko.

Sa ako nang giingon, kulang sa vision ug political will ang atong mga lider kaniadto pag-implementar sa maayong sistema sa transportasyon, drainage ug uban pa. Karon, kinsa ang nag-antos? Kitang mga yanong lungsoranon.