Anak sa panday

Binasi sa: Mt. 13;54-58

Matag Mayo 1 atong gisaulog ang Labor Day kun ang Adlaw sa Mamumuo. Ning maong adlaw usab atong gipasidunggan si San Jose nga Mamumuo.

Kini tungod kay si San Jose ang nibuhi sa iyang banay pinaagi sa pagpatulo sa iyang singot pinaagi sa pagpamanday.

Kining maong trabaho maoy nasunod usab ni Jesus atong Ginoo mao nga nailhan siya ingon nga anak sa panday.

Mao nga wala kaayo motuo kaniya ang mga kadagkoan ingon man ang mga magtutudlo sa balaod sa iyang mga pagtulon-an kini tungod kay sila nahimong nakamenus ning tawo nga wala makaagi og pormal nga edukasyon apan nagtudlo kanila kalabot sa relihiyon. Sila nagkanayon dili ba anak man siya sa Panday? Si San Jose ang ilang gitumbok niini.

Angayan ba gud nga ikaulaw ang trabaho ingon nga panday? Ang tubag dili.

Kini tungod kay bisan unsang trabaho makahuloganon ug balaanon.

Kinahanglang mopasingot gyud ang tawo sanglit pagpadayag man kini sa iyang pagka siya. Ang imong trabaho mosalamin man sa imong pagkatawo.

 Kay ang pagtrabaho dili man mahitungod lang sa sweldo kondili sa imong madawat nga pagsalig kanila nga nagpatrabaho ginamit ang imong katakus.

 Ang trabaho nga pinasikad sa gugma ug pag-ampo mamahimong makapabalaan kanato. Mao kini ang hinungdan kun ngano ang atong Ginoo wala maulaw nga pagatawgon siyang anak sa panday.

 Viva San Jose! Viva!