Naglagiting nga kahimtang

Summer na gayud dinhi sa nasud ug grabe na usab ka init sa panahon karon. Mogawas lamang kita og kadiyot gikan sa panimalay o opisina mora’g malipong na gumikan lagi sa naglagiting nga kainit sa adlaw.

Mao kini ang atong nasinati sa nangaging mga adlaw. Ug ang mga weather forecaster miingon nga molahos pa kining ting-init ngadto sa ulahing bahin karong tuiga gumikan sa umaabot nga El Niño phenomenon.

Sa among opisina sa downtown Cebu City, ilabina sa Colon Street, halos dili maagwanta ang sitwasyon sa gawas. Kini tungod sa mga konkretong building nga maoy nagsugnod usab sa kainit sa panahon.

Mao nang angay natong sundon ang mga advice sa mga health expert, ilabina sa Department of Health. Inom og daghang tubig ug dili magsul-ob og baga nga sinina kon anaa sa gawas panahon sa kaudtohon.

Tungod kay uso karon ang heatstroke, mas maayong likayan na lamang ang pagsige og laroy sa gawas aron paglikay sa kainit. Daghan nang namatay gumikan niini busa kinahanglang mosunod kita sa mga pahimangno.

Basta ting-init na gani, dili lamang ang atong kahimtang sa panglawas ang maaberya. Lakip sa maapektohan ang mga panguma, suplay sa kuryente, tubig ug uban pang mga nag-una natong panginahanglan.      

Daan nang gipahibalo sa National Grid Corporation of the Philippines nga mangandam ang tanan sa posibleng power interruption karon panahona. Ug expected nga adunay rasyon usab sa tubig gumikan sa pag-uga sa mga tinubdan.

Lahi nang kalibotan karon. Tungod sa global warming gumikan sa nagkanipis natong ozone layer, nagkayabag na ang kahimtang sa atong panahon. Epekto na ba kini sa atong sige nga pag-abuso sa kinaiyahan kaniadto?