EDITORYAL - Krisis sa kabataan

Angay ikaalarma sa mga otoridad ilabi na sa DepEd ang sagunson nga paghikog sa mga estudyanteng Pilipino ilabi na karong nibalik na ang face to face classes.

Sumala pa sa report sa Philstar.Com, dunay 404 ka tinun-an sa pangpublikong tunghaan ang naghikog niadtong tuig 2021. Samtang 2,147 sab ang nisuway sa paghikog ug 775,926 ang nagpatabang sa guidance counsellors.

Angay unta sabton sa mga hamtong nga ang mga kabataang nag-edad 11 hangtud 16 anyos naa sa edad nga sila manukad palang para sa ilang kaugalingon ug sa komunidad.

Mao nga daghan sa mga kabataan anang mga edara ang gustong mo-explore sa gawas sa ilang mga pinuy-anan.

Nianang tuiga sa 2021, gipatuman ang online ug modular classes tungod sa pandemiya sud sa duha ka tuig, wala silay magtutudlo nga direktang makatudlo sa mga bata o makahatag og mga eskplinasyon sa mga butang nga ilang gikalibgan.

Samtang naa ra sila sa ilang panimalay anang mga panahona ug nangatanggong tungod sa mga lockdowns ug daghang restriksyon, duna kini epekto sa ilang paglambo.

Aning mga edara usab ang mga bata nakasinati og daghang kausaban. Pisikal nga kausaban ug sa panghunahuna, sa laktod naa sila sa krisis sa ilang pagkatawo.

Anha sila makasinati kalibog sa paghimo og mga desisyon para sa ilang kaugalingon apan usahay magtukmod kanila ngadto sa kadautan o peligro sa ilang kaugalingon ug pagkatawo.

Aning grupoha sab makita ang daghang mga tentasyon, emosyon, ug daghan pang uban nga maoy nagdiktar sa pagkatawo sa batan-on nga maoy iyang madala unya sa iyang pagkahamtong. Apan subo lang nga nakalimot na ang mga hamtong nga miagi sab sila niini nga krisis, ang uban dili makamaong mosabot ug diretso rang mangasaba.

Dili mohatag og eksplinasyon o pagpasabot tungod sab tingali sa mga giatubang nga problema sa panimalay. Apan dili kini husto, responsibilidad sa mga ginikanan ug mga hamtong sa panimalay ang paggiya sa ilang mga kabataan.

Ang mga batang dili lig-on ang pundasyon sa emosyonal nga aspeto daling maapektahan ug mohimo og mga butang nga pwedeng ikadaut sa uban o sa ila mismong kaugalingon tungod sa kalagot ngadto sa ilang magtutudlo nga sa ilang tan-aw dili gustong mosabot sa ilang sitwasyon.