Ayaw pakganga ang kalamboan

Mitumaw na usab kining isyu sa ownership sa Compania Maritima sa dihang nakakuha og writ of preliminary injunction ang Cebu Port Authority (CPA) gikan sa korte aron pagdili sa lokal nga kagamhanang sa dakbayan sa Sugbo pag-occupy sa maong building ug palibot niini.

Gumikan niining maong kalamboan, klaro nga madelatar gayud ang lakang pag-develop sa Compania Maritima ug kasikbit nga mga lugar. Ug dili kini maayo nga tilimad-on alang sa kalamboan sa siyudad.

Ang mga tigpaniid naglibog karon kon unsa ba gayud ang basihan sa CPA sa sige niining sing-al nga maangkon ang Compania Maritima. Gani, wala ko makamatikod nga mipakita ang CPA og mga ebidensiya pagmatuod nga nakapanag-iya kini sa Compania Maritima.

Usa sa kalibgan sa uban kon, gawas sa Compania Maritima building, unsa ba gayud kadako ang lugar nga gi-claim sa CPA. Aduna bay deskripsiyon o sukod ang port authority nga nagpamatuod nga sila maoy tinuoray nga tag-iya sa maong lugar? Usa kini sa mga importante’ng isyu nga angay klarohon sa maong ahensiya.

Sa ato nang nakita sa mismong gibarugan karon niini, ang Compania Maritima ug kasikbit nga mga lugar layo sa dagat og pipila ka metros. Ug gani, wala g’yuy port operation nga natigayon diha sa maong lugar.               

Niining pag-release sa writ of preliminary injunction nga nakuha sa CPA, ambot kon kanus-a nato makita ang katumanan sa dakong plano pag-develop sa Compania Maritima ug palibot niini ngadto sa usa ka world-class tourism district sa dakbayan sa Sugbo. Sayang tungod kay miarangkada na unta ang maong proyekto. Gani, dako na og nahimo ang lokal nga pangagamhanan ug ang kompaniya sa ilang joint venture pag-modernize sa downtown area, ilabina sa Carbon Market ug kasikbit nga mga lugar,

Apan ambot kon unsa nga klase sa hangin nga nasinghap sa mga opisyal sa CPA nganong grabe man silang nakababag sa lakang pag-develop sa Compania Maritima nga alang man unta kini sa kalamboan sa dakbayan.

Hinuon, maayo na lamang kay misaad si Cebu City Mayor Michael Rama nga iya g’yung depensahan ang posisyon sa dakbayan pag-angkon sa Compania Maritima. Ug hinaut nga molampos ang lokal nga kagamhanan.