Adlaw'ng natawhan

Mahinungdanon alang kanato ang pagsaulog sa adlaw nga natawhan. Mao ni ang hinungdan kun nganong mangandam gyud ang uban kanato gani, ang uban maghikay pa sa hilabihan.

Apan ang uban gumikan sa kalisod nga ekonomikanhon ang mosimba o managkot dungan ang paghangyo nga hatagan pa unta og hataas nga kinabuhi aron sa pamilya makaalagad.

Apan niadtong Septiyembre 8 nangandam ug naghikay mi og yanong pamahaw dinhi sa kumbento. Ang rason niini mao nga birthday ni Mama Mary inahan sa atong Ginoo.

Bisan asa dinhi sa Sugbo ug sa tibuok simbahan atong gisaulog kining maong piyesta uban ang pagmaya.

Anaa ang naandang manianita, pagkanta sa happy birthday, duna pay cake.

Human sa Santos nga Misa natural lamang nga maghugop aron mamahaw. Dunay diyotay nga kukabildo ug mga talidhay.

Sadya gyud kaayo bisan yano ang kasaulogan. Kini tungod kay gimahal nato ang atong Langitnong Inahan.

Apan ang makapahimo ning tinuig nga piyesta mao man ang pag-awat adlaw-adlaw sa mga hiyas ug birtud ni Maria.

Siya nga atong Inahan masinugtanon gayud. Kining maong pagkamasinugtanon magdasig unta kanato aron mamahimong mas palabihon nato ang kabubut-on sa Dios kay sa atong kaugalingong kabubut-on.

Happy birthday Mama Mary! Viva Maria! Sulugoon ako sa Dios matuman unta dinhi kanato sumala sa imong pulong!