Work-from-home

Misugyot si Senador Grace Poe nga tungod sa padayong pagsaka sa presyo sa gasolina ug sa kakulang usab sa public transport, angayan nga mo-implementar usab ang kagamhanan sa work-from-home options alang sa mga trabahante sa gobyerno. Daghan na man ang nag-work-from-home nga empleyado sa gobyerno, kadto’ng gitawag nga 15-30 employees nga motunga lang sa trabaho-an panahon sa ting-sweldo.  Makapahinumdum kining sugyot ni Senador Poe sa naglalis nga magtiayon kay ang bana nga embalmer misugot man sa mandar sa iyang boss nga mag-work-from-home. Tungod niini, nagdala ang bana og minatay sa ilang balay aron embalsamahon.  Pagkatoytoy!

Tumanon ang saad

Matud ni Senador Kiko Pangilinan, malisod tumanon ang campaign promise ni President-elect Bongbong Marcos nga pa-ubsan ang presyo sa bugas kay kulang sa budgetary support ang sektor sa agrikultura. Dili angay lauman ang mga saad panahon sa kampanya.  Kay ginaingon man “ang politikanho’ng kampanya maoy lubnganan sa mga matuod nga ideya ug natawhan sa mga hagukâ nga saad ug panumpa”.  Apan angayan gihapon suwayan sa pagtuman sa kagamhanan ang maong saad.  Kay ginaingon man usab nga “Usahay, kon buot ka nga mobuhat sa labing sakto, kinahanglan nga tumanon mo ang mga saad bisan wala nimo kini gihimo”.  Mao vah!

Kulang sa abilidad?

Wala makompleto sa Department of Human Settlements ang 6-year housing target nga 1.26 million house and lot units ubos sa Philippine Development Plan 2016-2022.  Apan gikalipay gihapon ni Housing Chief Eduardo del Rosario ang 86% nga accomplishment ug mala-umon siya nga ipadayon kini sa sunod administrasyon.  Ginaingon nga “ang abilidaran, maka-igo sa target nga dili ma-igo sa uban; ug ang ma-alamon maka-igo sa target nga wala makita sa uban”.  Maingon ba nato nga kulang sa abilidad ug kaalam ang mga kawani ug opisyales sa Department of Human Settlements? Madahaan!

Pinasikad sa gahum

Mipalabang og ordinansa ang Cebu Provincial Board nga nagsuporta sa executive order ni Gob. Gwen Garcia kabahin sa optional nga pagsul-ob sa face mask.  Apan alang sa DILG, nahasupak ang maong executive order sa lagda sa IATF.  Tataw nga ni’ng panagsungi, gibase lang sa gihuptan nila’ng gahum ang ilang argumento ug dili sa kaayohan sa katawhan.  Mora’g nahisama kini sa estorya sa duha ka buta nga nag-atubangay pagsakay sa sakayan, hinungdan nga sa ilang pagpamugsay, nagtuyok-tuyok lang hinoon ang sakayan ug wala gayod mo-irog sa ilang nahimutangan.  May’pag moligeeed!

Kalamboan sa tanan

Matud sa Department of Finance, ang pagpakunhod sa galastohan sa mga proyekto’ng imprastruktura mahimong makasulbad sa suliran sa budget deficit sa hinanali, apan makadaut usab sa ekonomiya sa nasud sa kapulihay.  Adunay punto ang DOF.  Maapektohan labi na ang mamumu-o kon undangon ang pagpatuman sa mga proyekto.  Laksot usab tan-awon nga katunga lang sa tulay ang mahuman.  Apan bisan sa kaanindot sa sugyot sa DOF, angayan gihapon bantayan ang pundo sa kagamhanan kay basin ang economic recovery nga gihandum, alang lang sa nangatungdanan ug walay labot ang katawhan.  Fezteleern!