Ikaduhang semana sa Adbiyento

Akong gihimong sukaranan sa pamalandong ning ikaduhang semana mao man si San Juan Magbubunyag. Si San Juan nagpuyo didto sa kamingawan, nagpuyo sa kinabuhi nga ascetic kun kinabuhi diha sa pagsakripisyo. Kining maong kinabuhi sa pagsakripisyo.

Dulon ug dugos ang iyang kalan-on ug panit sa kamilyo ang iyang bisti. Sa maong kamingawan si Juan Magbubunyag ang nihimo sa iyang kaugalingong pagpangandam sa taliabot nga Mesiyas.

Nakita niya ang iyang kaugalingon ingon nga precursor lamang ug dili mao ang gipaabot. Usa kini ka mapaubsanong pag-angkon sa iyang kaugalingong limitasyon.

Ning ikaduhang semana sa adbiyento gihagit kita sa paghinuklog nining mosunod:

1.  Matag usa nato dunay kaugalingong tawag ug kining maong tawag mao ang matang sa kinabuhi nga mosugot ta ug sa dili atong pagasubayon isip tawo ug isip magpapanaw.

Kinahanglan ato kining palig-onon.

2.  Disiplinadong kinabuhi mahinungdanon ug mas maayo kun itandi sa kinabuhing mapasagaron. Bisan gani sa paagi nga kita mokaon kinahanglan nga atong hunahunaon ug pamalandongan.

3.  Ang tawag sa kabag-ohan mahinungdanon. Bisan pa man sa panahon nga kita nagtuo na nga nahimo na kitang santos tungod sa atong panghunahuna ug pagbati mahinungdanon sa gihapon ang pagpaningkamot alang sa kausaban.

4.  Ang pagpaubos mahinungdanon labina gyud ning mga panahon nato karon diin daghanan sa mga tawo ang nahimong mga mapahitas-on.

Mapahitas-on tungod kay nagtuo sila nga hingpit na sila ug anaa na kanila ang tanan nga ilang gipangita.

Malisod man tuod ang paghimo sa kaugalingon nga mabag-o apan tinabangan sa grasya sa Dios ang tanan mahimo gayud.