Fastcraft sa Olango Island

Atong namatikdan nga gihatagan karon og pagtagad sa administrasyon ni Mayor Ahong Chan ang isla sa Olango. Very good. Being an Oponganon, malipay kaayo kong makadungog sa mga kaugmaran sa dakbayan, lakip na sa isla sa Olango. Ang among katabang sulod sa kapin 20 ka tuig, mga bata mi, taga-Tingo. Ug kahinumdom pa ko nga sa daghang mga higayon nga moduaw gayud mi sa isla, ilabi na sa diha pa ko nagtrabaho sa gobiyerno.

Ug karon, niining plano ni Sec. Ade Sitoy paglansar pagka-representatente sa bugtong congressional district sa Opon, nga kon siya modaug, iyang banhawon ang dugay na kaayong gilaraw paghimo sa Lapu-Lapu City, into a separate province, which would o of course, include Olango Island, nga himuon na unya nga usa ka municipality.

Mo-qualify man tingali kita sa mga requirements, in terms of income and population. So, ang unang mga lakang mao ang pagpadaug sa usa ka representante nga mangusog na unya didto sa hawanan sa Kongreso pag-convert the city into a province. Unsa man, Mactan province?

Sa atong gihisgutan sa unahan, niining kaugmaran karon sa isla, si Mayor Ahong Chan nagkanayon:  “We will make the island as an eco-tourism site. Nindot i-explore ang Olango Island. We can see beautiful beaches, watch the migratory birds, naay marine sanctuaries, naay mga dolphins ug thresher sharks. Naa sad diri ang biggest cross-guitar.”

Kanang migratory birds, nakasaksi na kami niana. Makalingaw, makakita ka’g daghang klasi sa mga langgam nga wala sa ato, nagkalainlain ang gidak-on o kagamyon, lainlain ang mga bulok o kolor. Makalingaw gyud. Ambut taga-diin ang maong mga langgam.

Mangawa lang pud ni sila, ug maghuwat na lang pud ka sa sunod nga season nga sila motugpa na usab diha sa Olango island. Ambot nganong makatul-tol man usab sila inigbalik nila nganhi sa ato.

Matud ni Ahong, kining paglusad ug pag-inagurar sa Sta. Rosa Ferry Express fastcraft, makadugang sa pagpalambo sa tibuok kaislahan sa Olango. Ang kinadak-ang isla sa Olango, ang Sta. Rosa, usa lang sa mga isla sa Olango.

“Nindot diri suroyan pud kay presko ang hangin, walay trapik unya daghan ta og mga tourist spots diri,” dugang ni Chan. Kining pag-modernize sa mga ferry boats nga mag-biyahan gikan ug nganhi sa sila, agi kini og pagtuman sa kamaduan sa Maritime Industry Authority (MARINA).

Nagpaabot si Chan og dugang investor sa mga ferry boats, ilabina karon ngq aduna nay duha ka developer nga magtukod og duha ka dagkung subdivision sa isla.

Maayo unta og dili kaayo nila mahalon, aron maka-afford ta’g palit o abang o usa ka unit. Adto na lang unya ta bakasyon sa isla. Walay trapik, walay pollution, ug I hope walay problema sa druga.

Karong bag-o gi-inagurahan ang 3,500 kwh nga planta sa elektrisidad, ug ang Vibrant power company naglaraw pag-put up og laing 5,000 kwh power plant ditto sa isla. Ang isla nagkinahanglan og 1,200 kwh kada adlaw. Busa, pagkakaron subra ang power supply sa isla.

“I am very happy of this development, this is a sign of progress, I am expecting more investors to come to the island.” matud ni Chan.

Hasta ko, lipay pud ko. .