Motivation

Matag tawo dunay tinguha ug gani naningkamot ang matag usa nga mamahimo kining mas lunsay ug tim-os segun sa gilatid sa sukaranan sa moralidad. Sama pananglit diha sa pagsulod sa kinabuhi sa pagkapari o pagka relihiyoso. Nindot ug balaanon kining maong tinguha apan luyo sa maong tinguha anaa ang ubang mga nagpahiping isyu sama sa tinguha nga mamahimong .

Seguro diha sa panaw sa kinabuhi labina kun maghisgot kita og ekonomiya, pagtamod sa kadaghanan ug uban pa. Mga butang nga kun dili kita mabinantayon nahimong paagi nga mobalhog kanato sa atong kaugalingong kalaglagan. Adunay mga politiko nga dunay dakong tinguha sa pagpangalagad. Apan tungod sa mga perks nga kuyog sa maong kawsa nahimong ipaagi sa kompetisyon ang pagkab-ot sa maong posisyon nga tungod niini kinahanglang pagabuhian gyud ang capital nga gikinahanglan.

Mao usab kini ang nahitabo sa mga managsuong Santiago ug Juan mga anak ni Sebedeo. Kining maong tinguha  nga  sa kaulahian makalingkod sa tuo ug sa wala ni Jesus panahon sa iyang paghari ang giapas dili  lang nila kondili sa ilahang inahan usab. Apan sila gipahigmata sa buhing matuod nga ang posisyon dili diay gyud mahinungdanon kaayo. Mas mahinungdanon ang mapaubsanong pagpaambit sa kaugalingon alang sa uban. Nasagmuyo ang mga kaubanan sa maong hitabo. Hinuon sa kaulahian gipamatud-an sa mga managsuon nga mamahimo diay’ng mahingpit ang kaugalingong tinguha kun tugotang lamang ang kaugalingon nga magpailawom sa kabubut-on nga gilatid sa Dios alang sa matag usa  nga buot mamahimong kabahin sa iyang kahugpongan.

Sa akong pagpamalandong personally, daw sa nihamtong na pud ang akong panlantaw. Kaniadto daghan kong buot kab-uton ug daghan kong buot pamatud-an daghang mga laraw, daghang mga kalihukan. Apan sa hinayhinay nilugdang sa kawalay kapaingnan ang tanan labina kun sa hinay hinay nahanaw ang pagsalig kanila nga kanimo nipakpak agig pagpadayag kunohay sa ilang pagpangga ug pagdason. Apan ang tanan nahimong lit-ag kay kining mga tawhana mao ra pud ang mounay kanimo pohon pohon kay bisan gani ang imong kaugalingong kadugo dili man kasaligan.

Ang motivation nga nahuptan ko ning mga panahona mao man ang paggahin og mas suod nga kalambigitan sa Dios nga nagtawag kanako alang sa linaing pulos ug nakita kong kontento nako ning maong matanga sa set up. Ang pag-ampo mao diay nindot himoon labina kun diha sa maong pagpabuhagay sa imong gibati walay tingog sa panghukom ug pangyubit nga imong nadungog gikan sa imong Dios nga gisaligan.