^

Sinulog ug Q pass

SAKSAK SINAGOL - Lucky Malicay (Banat) - January 4, 2021 - 12:00am

Gusto ni Cebu City Mayor Edgardo Labella nga padayon gayud ang pagpatuman sa quarantine pass sa dakbayan panahon unya sa Fiesta Señor diin naandan na nga gatusan ka libo ka debotong Katoliko ang modagsa dinhi.

Nagtuo si Labella nga ang padayong pagpatuman sa quarantine pass usa ka epektibong paagi nga mokontrolar ang pagkuyanap sa makamatay nga coronavirus disease o COVID-19 panahon unya sa mga kalihokan sa fiesta, ilabina ang Sinulog Festival.

Ang desisyon ni Mayor Labella sukwahi nga nanglabay niyang lakang sa mga kalihokan sa kasaulogan sa Pasko sa niaging bulan diin adunay higayon nga gisuspende una sa lokal nga kagamhanan ang pagpatuman sa quarantine pass. Kini agi og paghatag og dakong kahigayonan sa katawhan nga ilang saulogon ang Pasko nga walay restriksiyon. Sama niadtong Misa de Gallo nga giluagan una sa kagamhanan sa dakbayan ang pagpatuman sa mga health protocol.

Hinuon, kun dili mausab ang iyang desisyon, adunay dakong punto kining maong lakang ni Mayor Labella pagpadayon gayud sa pagpatuman sa quarantine pass panahon sa kasaulogan sa piyesta ug sa Sinulog sa dakbayan.

Daghan sa mga kalihokan sa Sinulog - sama sa live performances diha sa Cebu City Sports Center ug street dancing palibot sa uptown area - ang gisuspende sa lokal nga kagamhanan. Kini isip pagsanong sa mando pagdili sa mga mass gathering tungod sa coronavirus.

Gumikan niini, walay rason nganong suspendehon pa ang pagpatuman sa quarantine pass ug tugotan pa ang katawhan nga makalulinghayaw sa gawas. Alang usab katawhan, walay rason nganong mogawas pa sila panahon sa Sinulog nga gidili man ang mga live performances.

Hinuon, makasaksi man sila sa mga kalihokan sama sa misa online sulod sa ilang mga panimalay.

Angay lamang nga sabton sa katawhan ang desisyon ni Mayor Labella ug sa kagamhanan sa dakbayan. Kini alang ra usab sa ilang kaayohan ug siguridad. Ilabina ning panahon nga pabilin ang dakong risgo sa COVID-19.

SINULOG
Philstar
  • Latest
Latest
Latest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with