Sakpan ang pagpangilad
RENBOR PATROL - Rene U. Borromeo (Banat) - July 2, 2020 - 12:00am

Husto ang gihimo sa atong mga tinugyanan sa Cebu City Transportation Office (CCTO) nga gihunong nila ang paghatag og delivery permit sa mga sakyanan kay gipahimuslan ra ni sa uban aron sila makagawas-gawas.

Nabantayan man gud sa mga law enforcers nga inig para nila sa mga sakyanan diha sa mga checkpoint, ang mga driver mopakita dayon sa delivery permit, apan wala may dala nga mga butang o kaha pagkaon nga i-deliver nila.

Mao diay, kay giabusohan man pinaagi sa paglukat og delivery permit aron sila nga makagawas-gawas ra ug dili ma-subject sa estrikto nga pagpatuman sa quarantine rules.

Hinuon, kadtong nahatagan na og permit, aw makapadayon pa mo kay dunay uban ninyo nga nakapangilad sa mga tinugyanan sa CCTO.

* * *

Pastilan uy, sa akong pagsuwat niining lindog, dunay mipahibawo nako nga lima ka iladong tawo dinhi sa Sugbo, dunay mga opisyal, ang anaa karon sa ospital ug posible nga natakboyan og Coronavirus Disease.

Mag-ampo ko nga unta maluwas sila tungod kay mga buotan kining mga tawhana, dili badlongon, ug ang duha gani maayo kaayong moserbisyo sa katawhan.

Ang duha, magtiayon nga nanag-iya og business nga gigamit sa kaliboan ka katawhan dinhi sa Metro Cebu. Dili  usa nato ibutyag ang ilang mga ngalan, ug ako silang iampo sa dali nilang kaayohan.

Pero nalipay ko kay ang congressman nga giingong usa sa natakboyan og COVID-19, mipahibawo nako nga fake news ang gipakatap nga mga report kay abtik pa kaayo siya.

Apan may haciendero kun tag-iya og katubhan nga namatay tungod sa COVID-19. Magmatngon gyud ta, dili magpasaya-saya nga kon mahimo, dili kita manggawas sa atong kabalayan kay wa kita makaila sa dunay virus.

* * *

Sugyot lang nako sa health officer dinhi sa dakbayan sa Sugbo nga ilakip unta sa inyong report kon pila ang inyong gi-swabtest, ug kon pila ang napositibo ug ang negative.

Kini aron nga dili magduda ang katawhan nga inyo ra nga gipatuo nga daghan ang na-positive pero buhat-buhat ra ninyo. Aw, ako hinuon motuo gyud nga dunay napositibo kay i-account man gyud kon hain sila.

Pero ang uban dili kaayo makahunahuna niini, mao nga iapil na lang gyud ninyo ang statistics sa inyong gihimoan og tests aron dili sila makaduda.

* * *

Angay gyud nga magtinabangay ang katawhan ug ang kadagkoan sa kagamhanan. Unsay buhaton? Ang mga tawo di kaayo mogawas sa kabalayan, apan ang kagamhanan kinahanglang mohatag kanila sa ilang mga panginahanglanon, dili kay pilion ra ang ilang mga suod.

Luoy na kaayo ang among kahimtang karon nga mga pobre, maayo man kamo kay mga kwartahan man mo. Di ba?

SAKPAN
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with