Way konsiderasyon, pagoryogoryo ug pagkapalong

Masalimuot ang mga nagkadaiyang opinyon nga mitumaw karon human sa pagpalong sa pagsibya sa ABS-CBN network sa niaging semana nunot sa order sa National Telecommunications Commission.

Nabahin ang katawhang Pilipino niining maong panghitabo. Adunay mipakpak sa kamandoan sa NTC batok sa maong network. Ug adunay grabe usab nga nasagmuyo sa maong lakang sa komisyon nga matud pa dinalidali kuno.

Kadto’ng misuporta sa maong order sa NTC nakakita og legal nga rason nga ilegal kuno mopadayon pa sa operasyon ang ABS-CBN tungod sa naugdaw na nga prangkisa niini human sa 25 ka tuig nga pagsibya niini sa kahanginan.

Apan kadtong mikontra niini misandig sa ilang alegasyon nga usa ka paglupig sa katungod sa libre’ng pamahayag ang mando sa NTC. Kini ilabina kuno kay adunay dakong kayugot si Presidente Rodrigo Duterte sa maong network.

Apan dili gayud mahuman ang pagkulitog niining maong isyu kun ang matag opinyon adunay gidapigan. Angay lamang nato nga ugkaton ang pundasyon niining maong isyu ug nganong miabot sa punto nga napalong sa kahanginan ang maong network. Insakto ba ang NTC sa order niini paghunong sa operasyon sa ABS-CBN? Kun sa legal nga aspeto, insakto tungod kay na-expire na man ang prangkisa sa maong network. Bisan ang maong network aware niini.

Apan sa dalidali niini nga lakang, miani usab og mga pagbatikos ang maong komisyon gikan sa katawhan. Kini tungod usab sa pagkawalay konsiderasyon niini gumikan sa nakaong-ong nga aplikasyon sa franchise sa mong network sa Kongreso. Usa sa mabasol usab ang Kongreso nga klarong nagyaka sa aplikasyon sa prangkisa sa ABS-CBN. Klaro usab nga ang paglangay sa Kongreso pag-aprobar sa prangkisa mugna usab sa nagpagoryogoryo nga attitude sa pipila ka magbabalod. Kini ang hinungdan nga mitiklop sa kahanginan ang maong network sa mando sa NTC, nga tulin pa sa alas kwatro nga nakapagawas og cease and desist order instead nga show cause order aron nga maka-explain unta ang maong network nganong dili angay kini nga sirad-an.

Karon, sad-an ba usab ang ABS-CBN tungod sa pagkapalong niini gikan sa kahanginan human ma-expire ang prangkisa niini? Kun natuman niini ang tanang rekisitos sa aplikasyon sa prangkisa, dili siguro angay nga mabasol ang maong network.