Dunol-dunol sa Bilanggoan

Sobra pa sa lockdown ang sitwasyon sa mga jail facility sama sa Cebu City Jail diin anaa ra gyud sa sulod ang mga Person Deprived of Liberty kon PDL.

Apan nganong nataptan pa man ang kapin sa usa ka gatos ka mga PDL sa coronavirus?

Gani Marso pa gihunong na ang visitation o dalaw sa bilanggoan isip lakang nga dili makasulod ang virus kay kuyaw kaayo sanglit over populated ang jail facility.

Dili lang mga inmates ang nataptan sa virus kay naay mga jail officers sa BJMP ang nagpositibo usab sa kagaw.

Wala na nila pasudli og dalaw ang jail facility apan padayon gihapon nga makasulod ang supply sa mga inmates gikan sa ilang pamilya nga gitawag nila og dunol dunol system diin ang mga jail guards ang modawat kinsa mao usay modunol ngadto sa mga hingtungdan nga inmate.

Posible kaha nga ang virus nipilit sa mga supply gikan sa infected family nga nakasulod sa bilanggoan ang tinubdan sa virus?

Dako kini nga posibilidad ilabi na kun wala ma disinfect ang mga supply dihang gidunol sa pamilya ngadto sa jail officer kinsa mitunol usab ngadto sa PDL.

Karon nahitabo na gyud ang gikabalak-an tungod kay nanuhot-suhot na sa Cebu City Jail ang kagaw.

Adunay kapin sa 6 mil ka mga PDL sa Cebu City Jail, unsaon man ni sila pagpahiluna simbako kun mograbe ang sitwasyon?

Dili layo nga magtinakdanay silang tanan tungod sa ka huot sa sulod, gani sa usa ka video nga migawas sa social media makita ang mga piniriso nga halos nagdikit na ang mga panit tungod sa kadaghan nila.

Ang gininhawa sa usa mahanggab sa mga kauban tungod sa kadaghan nila, isyu usab ang sanitation nga klarong wala sanglit problema nila ang tubig.

Sa nahitabo karon susama ra sa gisentensyahan na silang daan tungod kay nabutang sa peligro ang ilang kinabuhi.

Dili sila pwede nga magawas sa facility kay lahi ang ilang sitwasyon, mas lisod ang ilang kahimtang nga wala silay kapilian.