Bag-ong distrito?

Daghan ang nakalitan sa pagdemitir ni Naga City Mayor Valdemar Chiong sa iyang katungdanan. Niadtong Lunes iyang gisubmitir ngadto sa buhatan ni Gobernador Gwendolyn Garcia ang iyang suwat pagpahibawo nga sugod karong Marso 16 mukanaog siya sa iyang pwesto ug itugyan ang pagdumala sa dakbayan sa Naga ngadto sa iyang anak nga si Vice Mayor Kristine Vanessa Chiong.

Wala siya mohatag og detalye unsay rason sa iyang pag-resign. Apan atol sa among panaghinabi sa telepono niadtong Martes sa gabii, matud ni Chiong nga napul-an ug gikapoy na siya. Matud niya nga panahon na nga itugyan sa mga batan-on sama sa iyang anak ang pagdumala sa dakbayan sa Naga.

Iyang giangkon nga usa sa mga nakapabugnaw niya sa pagpadayon sa pagserbisyo mao ang kadaghang gimbuhaton nga gisangon karon sa Department of the Interior and Local Government (DILG) ngadto sa mga local chief executives, usa na niini ang road clearing operation.

Daghan ang wala motuo nga napul-an lang si Chiong hinungdan nga nakahukom siya pagluwat sa pwesto tungod kay alang nila taphaw ra ang maong rason. Posible nga tinuod ang ilang pagduda ug tingali taphaw ra sab ang iyang rason.

Apan dili imposibli nga ang taphaw niyang rason mao gyuy tinuod nga hinungdan sa iyang pagkanaug sa pwesto tungod kay wala may mawala niya. Mi-resign man si Chiong sa iyang pagkamayor apan ang gahom nagpabilin sa ilang pamilya sanglit ang mobanos niya mao ra man pud ang iyang anak. Ang mohulip sa pwesto isip bise mayor mao sab ang igsuon ni Chiong nga si Konsehal Virgilio Chiong.

Miluwat man siya sa katungdanan apan dili pa ni maoy katapusan sa iyang pagpangalagad sa katawhan. Giangkon ni Chiong sa among panaghinabi nga posible pa siyang mobalik sa politika apan adto na sa Kongreso.

Iya hinoong giklaro nga dili siya makigbatok sa giilang lider sa unang distrito nga si Kongresista Eduardo Gullas ug sa apo niini nga si Talisay City Mayor Samsam Gullas. Ang gipaabot ni Chiong mao nga mabuak ang first district ngadto sa duha ka distrito.

Ang Talisay City ug Minglanilla magpabilin sa orihinal nga distrito samtang ang bag-ong distrito langkuban unya sa Naga City, San Fernando, Carcar City, ug Sibonga. Ang problema kun mosugot ba ang mga Gullas niini.