Pulos nakatugpa sa Sugbo
Nagkapuliki pa gani ang Department of Health (DOH) sa pagsubay sa mga pasahero sa tulo ka ayroplano nga nasakyan sa duha ka Chinese nationals nga nakaduaw sa Sugbo ug Negros Oriental sa wa pa mapamatud-i nga natakdan sa Wuhan coronavirus sa Manila, napun-an na sab ang ilang gimbuhaton.
Kinahanglan na sab nilang subayon sa labing daling panahon ang mga pasahero nga gikauban sa ikatulo nga natinong natakdan sa bag-ong kagaw: 60 anyos nga babayeng Chinese national nga nitugpa sa Mactan Cebu International Airport (MCIA) sa wa pa moduaw sa Bohol.
* * *
Nahibaw-an sa DOH nga pulos taga Wuhan ang tulo, pulos niagi sa Hong Kong ug nagligas lang og usa ka adlaw pag-abot sa Sugbo: Mas una ang ikatulo nga nitugpa niadtong Enero 20, usa ka adlaw human sa Piyesta Senyor, ug nisunod pagtugpa ang duha niadtong Enero 21.
Hinaot nga human nabisto sa Senado ang pagpabaya sa DOH sa pagsubay sa 331 ka pasaherong gikauban sa duha ka Chinese nationals (50 ray ilang natultolan), mas matinud-anon na silang moila sa mga pasahero nga posibleng nakaduol ug natakdan sa ikatulo.
* * *
Gitagalan ni Health Secretary Francisco Duque III ang mga tagduma sa Epidemiology Bureau sa DOH og duha ka adlaw sa paghingpit sa contact tracing sa kaubang mga pasahero sa duha ka Chinese nationals. Kon mapakyas sila, nipasidaan si Duque nga may manligid nga mga ulo.
Gipaabot hinuon nga mas paspas nang matuman ang tahas kay nitabang nang kapolisan. Kinsa nangayo nag listahan sa mga pasahero nga nakalingkod sa upat ka lumbay sa atubangan, luyo ug kilid sa tulo ka natakdan nga Chinese nationals.
* * *
Mahimutang na sab hinuon sa pagduda ang kamabinantayon sa DOH pagsusi sa mga pasyente nga gidudahang nataptan sa kagaw.
Kay ang ikatulong pasyente ilang gipagawas sa pribadong tambalanan sa Bohol human nakaplaging negatibo sa Wuhan coronavirus ang iyang samples nga nakuha niadtong Enero 24 ug gipada sa laboratoryo sa Australia ug sa Research Institute for Tropical Medicine (RITM).
Nakalupad na siya paingon sa Shenzhen, China kuyog sa iyang kaubanan dihang gisubli pagsusi sa RITM ang lain niyang swab sample nga gikuha niadtong Enero 23 ug nakaplagan nga positibo sa bag-ong kagaw.
* * *
- Latest
