EDITORYAL - Ang POGO ug krimen

Nagkadaghan na ang mga Chinese nationals nga nia karon sa Sugbo ug sa ubang bahin sa nasud. Sa wala pa kining gikahadlokang novel corona virus, daan ng midagsa ang mga taga mainland China dinhi tungod sa Philippine Offshore Gaming Operations.

Kaning mga online nga sugalan gipadagan sa mga Chinese gambling lords ug tingali pipila ka mga adunahang Pilipinong may koneksyon kanila nang-hire og mga Chinese gikan sa mainland China.  Ang gobiyerno nitugot sa POGO nunot sa kadako sa makolektang buhis gikan kanila. Kaning makolektang buhis padung gyud sa panudlanan sa Pilipinas ug magamit kini alang sa mga programa sa gobiyerno ilabi na sa administrasyon.

Apan samtang tuod nagkadako ang koleksyon buhis, nagkasaka sab ang krimen dinhi sa Pilipinas ilabi na sa mga lugar diin nag-operate kining mga POGO sama sa Metro Manila.

Tungod dili tanang nanganhi tinarong ang tuyo kay ang uban miari nga ang tumong mamiktima sa ilang mga kababayan.

Ang kapolisan naalarma sa pagsaka sa mga kaso sa kidnappings nga nalambigit ang mga Chinese nationals ang mga biktima apan mga Chinese hasta ang mga suspek. Nagunay lang sila.

Ning bag-o, giimbestigar karon sa Senado ang kabahin sa human trafficking nga may kalambigitan sa prostitusyon. Apan naglambigit na sa Chinese, Koreans, Russians ug pipila ka Pilipino nga duna pay bata.

Dili unta ipadaplin lang sa mga opisyales sa gobiyerno kung unsay nahitabo sa nasud sa Myanmar sa dihang ilang gibuksan ang Chinese offshore gaming operations didto.

Misaka ang mga kaso sa kidnappings, prostitusyon, human-trafficking ug ingon man ang pagkuyanap sa illegal nga drugas.

Angkunon man o dili, lisud kaayong mailhan kun miyembro ba sa criminal gangs ug kun kinsa ang lehitimong mga manarbaho sa POGO kining mga Chinese nga manganhi. Kay natural ini og anhi nila turista o trabaho ra ilang itug-an.

Unsa may gihimo karon sa kapolisan ug sa gobiyerno nga mapakgang kini?